孔慶翔自爆曾沉迷賭博致離婚收場 現戒賭並與第三任太太積極「造人」

孔慶翔（William Hung）當年參加《全美偶像大賽》（American Idol），嗰時仍係加州大學柏克萊分校（University of California, Berkeley）土木工程系三年級學生嘅佢就獻唱Ricky Martin歌曲《She Bangs》，走音歌喉配上騎呢舞姿被評審狠批兼叮走，但一句「I already gave my best, and I have no regrets at all（我已盡全力，我毫不後悔）」爆紅，一度回港發展，曾與薛家燕合演《我亞媽發仔瘟》，又推出過唱片，風頭一時無兩。及後，於2011年返回美國，有指孔慶翔曾於衛生部門工作、擔任人生導師、政府部門分析師等等；期間，孔慶翔曾回港於夜店演出，當時被問到會否再戰樂壇，就表示順其自然，有啱嘅登台工作都會做。

感情方面，孔慶翔共有三段婚姻，第一段婚姻相識6個月結婚，僅維持10個月婚姻關係；2014年與第二任太太Jian Teng結婚，有傳對方為執業護士，二人因工作而認識，當時佢更向外國傳媒表示好開心搵到一個支持佢嘅人；不過孔慶翔近日自爆，二人離婚原因係因為自己當年懶賭。孔慶翔早前接受美國雜誌訪問，大爆自己早於三年前放棄正職，由玩撲克到涉足賭博體育，成為職業賭徒，因而付上離婚嘅代價。及後，孔慶翔決心戒賭並重返舊工作崗位，去年亦與第三任太太Hannah結婚，現正積極與太太「造人」；雖然對幕前演出仍有興趣，但就會以照顧家庭為主。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！