封殺舞台劇獎｜田蕊妮奪劇后：舞台好貴重唔可以消失 黃子華：頒獎禮宜多搞｜Yahoo

【Yahoo 新聞報道】上屆香港舞台劇頒獎禮遭藝術發展局及康文署「雙重封殺」，拒絕資助活動及提供場地。香港戲劇協會終需自資籌辦今屆頒獎禮，於今晚（29日）在灣仔一間餐廳舉行，場地縮水約八成。田蕊妮勇奪劇后，她形容「舞台唔可以消失，係好貴重嘅一件事」。今屆失落劇帝寶座的黃子華表示，香港的表演創作機會已不多，「其實我哋應該做多啲咁樣嘅嘢（頒獎禮），如果唔係對於成個香港嘅創作都冇好處，適宜多搞、不宜少搞」。

文字記者：盧珮瑤
攝影記者：Oscar Liu

相關報道：
舞台劇獎｜康文署拒借場 頒獎禮改餐廳舉行 劇協馮祿德：本初心唔踩犯法嘢 其他人鍾唔鍾意冇得估｜Yahoo

田蕊妮奪劇后：劇場人好有愛

田蕊妮憑《大離婚日》一人分演10多個角色，勇奪最佳女主角（喜劇／鬧劇）殊榮。入行30年的她形容，近年才踏足舞台劇界台板，笑言是劇場新丁。田對劇場人心存敬意，「好多劇場人連最低工資都達唔到標」，但仍為業界傾盡全力，「劇場人係好有愛」。她又指，舞台是貴重的一件事，不可以消失，是一個空間內和所有觀眾每分鐘、每一秒開心地笑、情緒交流。

黃呈欣以《植物人》勇奪最佳導演（悲劇／正劇）。她致辭時表示：「我唔會亂講嘢，但我好希望香港政府，相信舞台劇可以賺到錢。就算戰爭或瘟疫時期，都係需要藝術，我哋可以以古諷今，睇返歷史，所以畀我哋繼續發展香港舞台劇！」馮祿德隨後上台致辭時，對黃笑言，「我哋已經難，有你喺度難上加難⋯⋯不過我哋會繼續去！」，獲全場熱烈拍掌歡呼。頒獎禮完結一刻，司儀以「明年一定再見」作結。

黃子華：氣氛好過金像獎

憑《愛我別走》提名最佳男主角（喜劇／鬧劇）的黃子華，最終不敵《史家本第二零二三回之伏虎降龍》的歐陽駿失落劇帝寶座。他稱首次出席舞台劇頒獎禮，「大膽講，你入去feel（感受）吓，氣氛係好過金像獎好多，因為每個人都好似為佢嘅戲嚟咁，好瘋狂吓㗎」。

林海峰：提升業界士氣

對於舉辦頒獎禮困難重重，黃子華認為，香港的表演創作機會已不多，特別舞台劇界生態更加吃力，「其實我哋應該做多啲咁樣嘅嘢（頒獎禮），如果唔係對於成個香港嘅創作都冇好處，適宜多搞、不宜少搞」。同樣憑《愛我別走》爭奪最佳男主角的林海峰，形容頒獎禮場地雖比以往「親密咗」，「好似公司搞嘅 party（派對）」，對業界士氣有所提升。

劇協「第 31 屆香港舞台劇獎」去年 6 月舉行，頒獎禮舉行約半年後，才被指活動存在「不妥內容」，遭藝發局扣減去屆資助，亦拒絕再資助今年的頒獎禮。藝發局於今年1月發聲明指，主辦方邀請的嘉賓漫畫家尊子及港台前編導蔡玉玲「充滿新聞話題」，大會兩名主持以「意有所指、語帶雙關」手法「引起公眾及媒體注意及製造社會話題」。劇協遭藝發局停止資助後，於2月起義賣紀念品為今屆頒獎禮籌募經費。