專訪｜J.Arie才女變「性女」 憑歌道盡多樣情慾 開性教育頻道：Your life, your choice｜Yahoo

【Yahoo 新聞報道】當香港性教育還在討論「打羽毛球」，獨立歌手 J.Arie 卻憑歌道盡性生活的各種可能。這名港大法律系「才女」出道逾 10 年，在樂壇蛻變成「性女」，歌曲宣揚「Your life, your choice」，讓 BDSM（綁縛與調教、支配與臣服）、多人運動等愛好者被看見。

她今年開設性教育 YouTube 頻道「Blxw jxb 射」，9 月更首度於性小眾平權活動 Pink Dot 表演，「如果我做教育局局長，成個教育制度要改，性教育要更加好！你以為我成日講咸濕嘢、講 sex（性），我係要講 education（教育）」。盡皆過火，盡是瘋狂，為香港樂壇帶來新衝擊。

「呢個社會，經濟已經咁差，係咪仲淨係唱愛情歌？係咪仲有咁多夢想可以實現？」談到現今的香港樂壇，J.Arie 道出無人敢宣之於口的評價，「我唔想自己咁平行時空，我希望用音樂去講出一啲我想講嘅 message（訊息）」。踏入最赤裸的音樂世界前，她也曾經高唱情歌：頂著一頭短髮的文青時期，為葉念琛多套電影唱出愛情的《你死我活》、分手時有愧於心的《我錯》。 承著電影口碑和浪潮，歌曲全部達數百萬瀏覽，她卻在流量遊戲中迷失，「嗰陣係我最迷惘最迷惘嘅時候」。

叛逆的「才女」

J.Arie 憑八級鋼琴底子、港大法律系畢業的背景，出道時旋即被形容為「才女」。事實上，在攻讀法律期間，叛逆的種子已在她身上蠢蠢欲動，「我個人太多情緒，要透過創作去釋放出嚟。如果唔係有機會做歌手，要坐 office 內心會日日慘叫」。

J.Arie 中學時參加歌唱比賽，經介紹下開始替著名監製及作曲人藝深唱 demo，2013 年大學畢業後正式出道。她的首支單曲《第一志願》配合自身經歷追夢為題，大唱「似紙飛機／要一試飛翔滋味」；首張專輯《Soliloquy》大賣，為該年唱片銷量最高的新人。

這個樂壇新人夢寐以求的成績，感受卻無以名狀 —「我其實都幾得意，好多時好快就知一樣嘢啱唔啱行，點解呢啲歌一路唱落去嘅時候，我唔係覺得最自在同開心呢？」

出道翌年，J.Arie 替多部大熱愛情電影唱主題曲，第二張專輯迅速出爐，「第二隻碟好似 repeat（重複）緊第一隻碟嘅嘢，我唔會覺得 consistency（一致性）係一個進步，只係原地踏步，我想每一隻碟都會有昇華」。當初被塑造的定位，作品卻格格不入，「推我出嚟係一個唱作嘅人，但啲歌都唔係我作㗎喎？咁我即係一個演繹者、聲優定咩呢？」違背自我的解離感一直維持到 2019 年，她孤注一擲，離開所屬唱片公司，更問父母借錢向監製賠錢解約，「當時我入行 7 年，但我寧願呢刻我乜都無、由零開始，我都覺得一定要走」。

「性女」的誠實日記

從崩塌走向重建，J.Arie 為自己寫了一本「誠實日記」追溯本我，分為愛情、事業、婚姻等篇章，坦露內心深處的想法。在〈我點樣睇愛情〉章節，她寫下「sex（性）真係好重要，我真係好鍾意搞嘢」。2020 年，她推出《雙面哈非》回歸樂壇，也是對樂迷的預告，「表明畀你聽我係雙面，你之前見到藝文青嘅我係一面，但另一面可能係爛晒面，而家將我最真實嘅自己挖出嚟畀你睇」。

翌年她推出不同精神病為題的專輯《Perfectly Guilty》，先挖出自己的第一面。專輯所有歌曲文案都寫著「我們每個人的身體都是一座精神病院，我們都是精神病人」：《雙面哈非》說精神分裂，《判官之印》說妄想症，《陰陽道具》則說性上癮。《陰》包著情慾的糖衣，卻意有所指，其時正值社會動盪，未來尚不可知，「仲會唔會可以有性嘅題材擺落歌度，都唔知，所以 sex（性）係一個表面，係想講更大嘅嘢」。

「你最需要 give a fxxk 嘅就係自己」

製作《Perfectly Guilty》時，J.Arie 幾乎自我掏空，思索如何昇華，「我都係充滿我自己一套歪理，但另一方面我又諗，呢個世界會有人同我差唔多諗法啩？」於是，她將這些「歪理」化成下一張專輯的宗旨，「如果我自己創立一個社會，我嘅秩序係乜嘢，應該點樣活」。其中一首主打，同樣是以性切入、暗道自由的《龍鳳登場》，「實質上係想講，你想點樣進行你的性生活係你嘅選擇，你覺得 one on one（一對一）滿足唔到你，你可以安全地進行你嘅多人運動」。

性的多樣性，完美融入《龍》的 MV，「呢個社會上，有無邊啲小眾文化嘅人好容易畀人針對呢？我想聚集呢班人」。J.Arie 找來「SM 女王」專業調教師 Lady Daphne、多人運動協會 HKSP、由 DJ 余迪偉變裝而成的 Ginger Queen 等參演，其中一幕眾人高舉胸圍，大唱「My slutty（淫蕩）、My gender（性別）、My life my choice（我的生活我的選擇）」。在她創立的「J 系社會」，「你最需要 give a fxxk（在乎）嘅就係自己，其實一個人能夠轉變自己嘅情緒、諗法，令自己更加好，令人哋更加好，其實係咪已經可以change the world（改變世界）？」

MV與性教育頻道同遭「黃標」：即管繼續diss我

「我（對《龍鳳登場》）覺得好 Proud（驕傲），當然，如果見到虛無飄渺嘅 view 數係傷心嘅」。《龍》的 MV 遭 YouTube「黃標」，只准 18 歲或以上觀眾收看，影響影片傳播，推出半年僅約 1.9 萬觀看次數，其他歌曲卻平均達 10 萬瀏覽。J.Arie 早前化身「淫婦J」，租下一架大貨車，巡迴多個地點，在車身播放《龍》MV，更落地即席演唱做宣傳。

不過，view 數不完全等於影響力。《龍》面世後，J.Arie 收到一位女同志的道謝訊息，說歌曲令自己有勇氣與伴侶探索更多性的可能，包括 BDSM，「以前做歌手無乜 mission（任務），但當坦誠咁面對自己嘅時候，個使命感更加重，好想盡自己少少綿力，send 到啲 message（訊息）出去，其實係想人open-minded（開明）多啲」。

J.Arie 不止想在歌中宣揚正確性觀念，今年中開設 YouTube 新頻道「Blxw jxb射」，為大眾性教育科補習。預告片中J.Arie穿上修女裝化身「性母 J.Auntie」，「禁忌主題要用一個再禁忌啲嘅角色！修女也瘋狂！」頻道內容包括親身試用性玩具，亦會以貼地方式傳授性愛技巧。預告片一出，是她受最多抨擊的一刻，「佢哋可能覺得，你做歌無問題，但你一貼地啲『今日教你點樣舐 X』就即刻好 cheap（廉價），但我就係想用香港人講 sex 嘅講法去 present（表達）」。

「Just do my best everyday」

「你即管繼續 diss（批評）我，話我成日將 sex 掛喺口邊、搏上位，其實我成日提就係想將佢平常化，融入生活，唔好到 2024 年都仲係『嘩嘩』聲，一講就係淫蕩」。

可惜，「Blxw jxb 射」同樣逃不過「黃標」命運。她赫然發現，在香港推動性議題萬般艱難，「有一下會覺得好氣餒，呢個明明係日常生活嘅嘢，但要呢啲資訊散開去原來係咁難」。目前她仍在構思新頻道去向，亦透過不同活動、訪問宣揚正確性觀念，包括香港家庭計劃指導會。J.Arie 是她入行時取的名字，「J」代表「Just do my best everyday（每天盡力做好自己）」。這位樂壇「性教育局局長」繼續盡己所能，勇往直前。