尊子漫畫停刊｜黃照達稱尊子處之泰然「瞓得好」 料政治漫畫屆末路

屢被港府點名批評的《明報》尊子漫畫將於周日（14日）停刊。已移居英國、仍在《明報》連載漫畫的政治漫畫家黃照達接受《Yahoo 新聞》訪問，指《明報》目前並未安排他頂替尊子欄目，估計報館亦不會在相同版位刊載政治漫畫，「都冇乜人畫啦」。黃早年曾收警方信件要求澄清漫畫內容，認為與尊子的遭遇同出一轍，「用呢種方法不斷施壓，變相個壓力就喺返報館同個作者身上」。

文字記者：盧珮瑤

《明報》尊子漫畫自去年 10 月起，先後六次被政府點名批評，《明報》今日宣布漫畫周日停刊，而有關尊子的書籍及資料，今日亦突然在公共圖書館下架。政治漫畫家、浸大視覺藝術院前助理教授黃照達接受《Yahoo新聞》電話訪問時稱，得知停刊消息後曾與尊子短訊聯絡，對方覆稱：「我OK呀！瞓得好！」，形容尊子一向處變不驚，「佢係好處之泰然咁去面對風浪，平靜咁去面對呢啲challenge（挑戰），呢個係我哋要向佢學習」。

黃：尊子係政治漫畫界大佬

黃指，2012年反國教運動起孕育不少網上政治漫畫，並隨連串社會運動爆發而發展蓬勃，「一直以來，尊子其實係『大佬』嚟，係最底嘅嗰個墊」。直至過去兩年多，本港政治漫畫產量瞬間大減，「除咗去咗海外嘅，其實全部都停晒，但大家一直都係擰轉頭望返尊子，究竟佢仲係咪可以繼續呢？」

對黃而言，尊子漫畫停刊屬意料中事。《明報》尊子漫畫自去年10月起，至少六度被政府點名批評。黃照達2021年於《明報》刊載關於少年警訊的政治漫畫，被警方點名批評屬「詆毀」、「抹黑」及去信要求澄清，「《明報》我相信暫時未係政府需要強烈打壓嘅傳媒，唔使好似《蘋果》咁封舖拉人，所以會用呢種方法不斷施壓，變相個壓力就喺返報館同個作者身上」。

黃照達2021年年底已辭去教席，舉家移民英國，現時仍於《明報》連載漫畫，包括每天連載、主打療癒系小故事的「小粉人看日子」，以及逢周日出版、談離散主題的「香港書」。以往尊子休假期間，黃不時會頂替其欄目。黃指目前《明報》並未安排他頂替尊子欄目，「我諗《明報》都唔會再特登擺政治漫畫落去，一嚟都無乜人畫啦」。

曾被溫提：小心啲好啲

由政治漫畫轉戰療癒小故事，黃照達仍有憂慮，「有時畫咗一枝旗、有粒星，呢啲畫唔畫得呢？好細微嘅嘢，但以免惹麻煩嘅心態，已經習慣咗有呢種心態去做，都係新常態」。黃照達與《明報》合作逾10年，一直未有限制漫畫題材、內容，「純粹係有時有一兩個圖，（明報）會話『咦，好似小心啲好啲喎』，咁我又唔係特登畫國旗或者challenge（挑戰）啲乜，咪拎走佢」，但已反映報館面對極大壓力。

隨著尊子漫畫停刊，黃估計香港政治漫畫界已走到終章，質疑政府容不下批評聲音，「以前睇到評論政府會唔理、有時都會好理性去反應，而家無論係文字定漫畫評論，都只係用一句『抹黑』、『不符事實』去回應，已經無咗嗰種胸襟」。政治漫畫的本質正正需抓緊政治議題與民情創作，引發大眾共鳴，「如果傳媒消失晒，或者唔再連載，（漫畫家）唔可以喺本土創作，基本上都好難可以再發展」。

續於明報連載漫畫：唔想同香港完全斷絕

「有啲人話喺海外你都可以畫，但其實喺外地你比較難知道香港嘅民情，變咗只可以畫啲『大路』啲嘅嘢」。話雖如此，黃照達仍堅持於香港主流報章發表作品，「作為一個離開咗嘅人，我唔想同香港完全斷絕」。他指目前其作品不屬政治評論，但會描繪港人心情，「香港人睇作品可能都會有另一種需要，我諗自己嘅作品都可以試吓畀到啲唔同嘅嘢佢哋，呢樣嘢我都想keep住」。