《愛情就係一物治一物》

愛情就好似一條食物鏈，每個人都有自己嘅命中「剋星」。有啲人喺朋友眼中係個麻煩難搞嘅河東獅，但偏偏對住男朋友佢就自動變咗小綿羊。有啲男人喺公司威風凜凜，但去到老婆面前都只係一隻聽話嘅小獅子⋯⋯

愛情就係一種無法解釋同無法預計嘅化學作用，呢個都係愛情嘅力量。

有個好大男人嘅男性朋友，認識好多年佢每次拍拖都係對個女朋友好冷淡，啲女朋友似係佢隻兵多啲，但最近見佢已經變咗個對女朋友百般遷就嘅小男人。又有個女性朋友好男仔頭，同所有人都好似兄弟咁，講嘢都夾雜好多粗口，大家都話過佢咁樣邊有男仔要呀！最後我親眼見到佢喺男朋友面前係幾小鳥依人。

與其話係愛情改變咗人，不如話愛情係會將人隱藏嘅一面帶出。有人會話呢啲就係「邊個食住邊個」，但我唔太喜歡將男女關係分咗上下，好似有一個人比較優越咁。我會覺得係，人與人之間都係有種化學作用，尤其係愛情面前，每個人對住愛嘅人都會不自覺咁變咗個唔同嘅人，有啲人會變咗個小朋友，有啲人會變咗隻小鳥。又因為好想好好維護呢段關係，人係會作出對呢段關係好嘅選擇。有時人總需要喺一段關係上作出妥協，而比較之下知道愛人比起其他堅持重要嘅，你就會自然去改變。