雅虎香港新聞 成熟版《聲夢》？TVB搞《中年好聲音》35歲以上玩得 網民︰屯公大媽全面進場
近年選秀節目再次喺香港興起，《全民造星》造出MIRROR、ERROR、COLLAR以及一班樂壇新血，TVB亦立即搞《聲夢傳奇》發掘出炎明熹、姚焯菲等年青歌手，就連《聲夢》始創人余詠珊過檔有線之後，都搞返壇《就是青春》，總之唱得嘅年青人唔怕冇機會。
而TVB早前就喺FACEBOOK出post，為全新選秀節目《中年好聲音》宣傳招募，參加者年齡要夠35歲，仲叫各位中年人「實現那些年一齊追夢的日子，以歌聲感動全城」。
參加新秀出道、近年主力教唱歌嘅歌手莫鎮賢，都有share呢個post叫學生參加，而有網友認為「TVB 終於醒覺自己市場喺邊度」、「屯公大媽全面進場」，亦有人感嘆35歲已經係中年。
其實網民講得好啱，「TVB 終於醒覺自己市場喺邊度」，睇而家廣告時段有咩客路就知。既然TVB捧場客係熟齡觀眾，就不如善用長處箍實收視。而且「高手在民間」，行過文娛中心大廳都見過民間歌唱團體舉行嘅演唱會，位位uncle auntie影poster都著到彩雀咁靚，表現慾何其旺盛可想而知，當中亦不乏唱得之人，面試墟冚程度唔難想像。
上年ViuTV都搞過長輩選秀節目《我不是廢老》，不過同Viu觀眾群格格不入，加上收視難以同TVB匹敵，難免石沉大海。而家由TVB出手，會唔會真係掘到筍盤，捧出個「中坑版姜B」、「50歲MC」或者「美魔女版阿Day」？
是日精選
成熟版《聲夢》？TVB搞《中年好聲音》35歲以上玩得 網民︰屯公大媽全面進場
除罩「見光死」後人氣急跌 鮮肉威威黑面拒受訪 派年輕壯男擋駕
MIRROR紅館意外︱林作揚言出1百萬助阿Mo 代任發言人爭取公道
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
