雅虎香港新聞 戲院重開 今個星期有咩好戲睇？ 狂舞派3／神奇女俠1984／拆彈專家2...
受新冠肺炎疫情影響，香港嘅戲院已經停業多時。直至近日疫情放緩，戲院終於可以喺聽日年初七（18日）重開，大家可以趕得切喺農曆新年入場睇好戲。今個星期有多套電影首批搶閘上映，例如有《神奇女俠1984》（Wonder Woman 1984）、《拆彈專家2》、《狂舞派3》及《靈魂奇遇記》（Soul）等等。各位餓戲已久嘅戲迷，唔知以下邊套電影啱你心水呢？
荷李活超級英雄電影《神奇女俠1984》（Wonder Woman 1984）由姬嘉鐸（Gal Gadot）主演及製作費高達2億美元，電影以80年代美蘇冷戰時期作為背景，講述佢將會迎戰兩大強敵，分別係麥斯維羅德（Max Lord）同埋豹女（The Cheetah）。
由劉德華、劉青雲及倪妮主演嘅《拆彈專家2》，主要講述前拆彈專家潘乘風（劉德華飾）昏迷於案發現場，其後被警方懷疑佢同邪惡組織有密切聯繫，所以列為頭號嫌疑犯。佢喺甦醒後逃走，希望靠自己可以查明真相。
《狂舞派》上映時大受歡迎，續集《狂舞派3》由顏卓靈、蔡瀚億及楊樂文（Lokman）等人主演，延續狂舞精神。電影劇情主要講述龍城工廈區因為租金便宜，所以20年嚟吸引不同範疇嘅創作人進駐，當中包括嘻哈獨立唱作人Heyo、排舞師奶茶、人氣YouTuber阿良、新晉藝人Hana及地下男友舞者Dave。不過近年工廈不停加租及嚴厲巡查，原來係地產商想將龍城轉型。其後佢哋收到工作邀請，阿良希望透過呢個機會令更加多人認識同欣賞佢哋呢班創作人。
迪士尼與彼思新作《靈魂奇遇記》喺好多地方上畫時叫好又叫座，早前更入圍金球獎「最佳動畫」及「最佳原創配樂」。電影邀請咗鄭中基聲演主角阿祖和王菀之聲演靈魂仔22號，劇情講述中學音樂教師阿祖希望成為職業爵士樂手及喺著名嘅Jazz Club表演，不過喺機會嚟之前發生意外，靈魂誤打誤撞入咗去新靈魂喺未出生之前接受特訓嘅地方。為咗重回人間，阿祖需要唔願做人又寸咀嘅靈魂仔22號幫手，之後佢哋仲展開一段意想不到嘅奇妙歷險。
紀錄片《金氏殺機》主要描寫北韓領導人金正恩嘅同父異母哥哥金正男喺馬來西亞機場遭刺殺一事。
《海邊的異邦人》
BL動畫電影《海邊的異邦人》改編自日本漫畫家紀伊Kanna同名漫畫，講述小說家橋本駿和憂鬱嘅高中生知花實央喺沖繩相遇並相戀嘅故事。
《消失的情人節》
台灣青春愛情電影《消失的情人節》由劉冠廷、李霈瑜及周群達主演，講述A0嘅楊曉淇喺郵局返工，而公車司機阿泰每日都會搵佢寄一封信。喺情人節前夕，楊曉淇被陽光男孩搭訕約會，不過瞓醒時情人節竟然消失咗。呢套電影喺2020金馬獎成績非常之好，一共獲得最佳劇情片、導演、原著劇本、剪輯及視覺效果五項大獎。
相關電影文章：
【影評】靈魂奇遇記 (Soul) || 我們都有獨一無二的火花
＝＝＝＝＝＝＝＝＝＝＝＝＝＝＝
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
