星期一催至有：2020年7成打工仔Work From Home！

至有姐我平時返工就一向扮到靚一靚，你知啦返工咁多女同事，個個都要爭艷鬥麗，唔係一身行頭邊有機會曬先係咪？不過睇完呢單新聞至有姐我即刻嚇到個心離一離呀！根據美國軟件商Citrix最新估計，2017年全球將會有50%公司採用流動工作方案，即係可以畀員工在家工作；而到咗2020年，更加會加至70%公司呀！

Citrix話有咁嘅趨勢主要係兩大主因，第一係目前愈嚟愈公司覺得工作可以喺屋企做，咁就可以減少辦公室Size，節省租金；第二個原因，就當然係因為員工都開始講求Work-life balance，可以在家工作自必然多咗時間可以做自己嘢啦係咪先。所以話只要工作做得晒，公司就唔應該管員工究竟幾時返工同埋邊度做嘢囉。

除此之外Citrix仲話辦公室趨向令員工打成一片，增加大家Social嘅機會，唔少Office都採用一張大嘅長櫈作為員工工作Area，可以成Team人一齊對住做嘢，有咩事都可以即刻出聲討論嘛，唔使下下約一間房開會咁Serious嘛。

至有姐就覺得香港打工仔應該都無福消受架喇，話晒我哋工時全球最長，奴性又咁重，就算老細畀你自由選擇唔返公司做，又有幾多打工仔夠膽先，係咪？

催至有：80後港女OL一名，每日返工即係扮工，熟讀辦公室生存之道，最愛煲韓劇，最擅長易容術，返工奉行三大宗旨：拖、推、御。