雅虎香港新聞 [最鍾意邊個版本？]《流星花園》翻拍7次！美國、越南都拍過？
台灣偶像劇之母柴智屏宣布翻拍《流星花園》，之前就出現咗幾個F4嘅人選，不過全部都係煙幕嚟，日前佢就公開咗新F4同杉菜嘅最終選角！
道明寺由今年19歲嘅王鶴棣飾演，來自四川嘅佢本身係一名空少，喺西南航空專修學院讀書時已經被稱為「西航彭于晏」！（唔知彭彭嘅粉絲點睇呢？）
後來參加選秀節目而入行，好多人都話佢歪嘴嘅笑容有壞孩子嘅感覺，好啱做道明寺。
花澤類由今年22歲的官鴻飾演，佢之前已經同宋芸樺一齊擔正柴智屏監製嘅網劇《別那麼驕傲》。私下嘅佢不拘小節，完全冇偶像包袱，同沉默嘅花澤類完全唔同，都有人話佢一頭卷髮啱演道明寺多啲。
飾演西門嘅係今年21歲、嚟自深圳嘅吳澤希，佢真係新人嚟，依套劇係佢第一個出道作品，連微博都係啱啱先開。
美作由同樣嚟自深圳嘅梁靖康飾演，佢嘅演出經驗係4個人當中最多嘅，經常做雜誌嘅模特兒，仲去過巴黎時裝周。
新F4嘅顏值相當唔錯，咁大家都對杉菜好有期待。飾演杉菜嘅係20歲嘅沈悅，佢眼大大樣子清純，不過就冇乜特色，真係有少少過目即忘。
2001年台版《流星花園》棒紅咗F4同大S係最令人懷念嘅一輯。依家睇番，其實好多位都好粗製，不過當時啱晒追偶像劇嘅人嘅口味，所以爆紅得咁犀利。
▲「如果道歉有用的話，要警察來幹嘛？」道明寺依句說話，小編到依家都講緊！（利申：小編係90後呀！LOL）
2005年日版《花樣男子》小編覺得係台日韓版最好睇，亦都係最跟近原著，5個主角嘅演技都可以話係最好嘅。
日版係演技最好，咁2009年韓版《花樣男子》一定係顏值最高，李敏鎬、金賢重、金汎、金俊，絕對係真正嘅花美男，具惠善都勁甜美，所以當時喺亞洲掀起煲劇潮。
2009年大陸版《一起去看流星語》畀好多人鬧爆勁膠，啲衫又唔靚，主角又唔靚，人哋F4（Flower 4）佢哋就H4（Handsome 4），總之一句講晒－－唔使睇。
▲聽歌搞到花澤類眼痛？想點啫你！
2013年美國版《花樣男子》！係咪冇諗過呢？連美國又有改編過，不過一睇個hea到爆嘅poster就知係劣質製作，睇埋F4嘅背景肯定你會忍唔住笑！
▲道明寺唔係富二代，變咗黑社會大佬個仔，打籃球好勁但係就好有性格咁抗拒咗NBA球隊嘅邀請；太太爺係學校嘅創始人，有傳會成為學校嘅校長。一個高中生會做校長？吹咩！有錢人真係大晒架！
▲花澤類出身於音樂世家，家族拎過過百座格林美，佢本身都係音樂神童，5日就學識彈鋼琴。個樣油到一點！仲有啲似王梓軒添！
▲西門係歌手嚟，唱片大賣，唔知點解仲會去返學？
▲你冇睇錯，美作係前面肥肥哋嗰個，唔講以為係F4啲跟班。
越南版，淨係睇相都飽晒......
photos credit： internet
＜延伸閱讀＞天然呆演活麻甩的士佬！馬國明憑《降魔的》發圍 擺脫膠劇男主命運？
＜延伸閱讀＞世紀復合！林志玲言承旭被拍得同遊馬來西亞 言承旭：希望大家給點空間
Related Articles
