【本地行山】行山裝備要識揀 嚴選合適裝備免中伏

Yahoo 旅遊
【本地行山】行山裝備要識揀 嚴選合適裝備免中伏
【本地行山】行山裝備要識揀 嚴選合適裝備免中伏

本地疫情放緩,唔少商業活動都重啟,好多人都急不及待出去活動一下;除咗睇戲、行街,好多人選擇郊外活動,可以呼吸新鮮空氣,環境又開揚。早前疫情嚴重之時,好多人都忽然開始行山,不過自從踏入5月,天氣突然變得非常炎熱,而又間中落一、兩場大雨,如果各位新手仍然使用太基本行山裝備,或者會有所不足。推介以下幾樣唔同類型嘅裝備,可以挑選心水產品,行山最緊要安全呢!

Click入即睇香港行山好去處專題頁,發掘更多本地行山資訊!

衫:宜緊身透氣

好多人以為去行山著一件普通運動Tee就得,其實最好穿緊身而有彈性、透氣貼身衫,最好附帶排汗、速乾等功能,宜穿淺色,可以無咁吸熱及避開蚊蟲。唔建議穿背心或者Sport Bra,因為好容易被紫外線曬傷,亦容易被旁邊樹枝刮傷。最好帶定一件Tee作替換,以防突然落雨濕身可以換;或者行完山成身汗可以換衫再坐車走。

行山要著淺色衫,一定要有排汗速乾功能。
行山要著淺色衫,一定要有排汗速乾功能。


最好著上身唔會太貼身,要有彈性。
最好著上身唔會太貼身,要有彈性。

褲:按行山難度

行山褲無一定標準,大致要輕便及具保護性就可以。至於褲是長是短,視乎個人需要,長褲可以保護雙腳免刮傷及避蚊;但短褲更易散熱,如果唔係挑戰太崎嶇嘅山頭,短褲其實已經都可以,或者短褲加Leggings亦係唔錯選擇。

香港行山宜穿短褲,有袋都好重要。
香港行山宜穿短褲,有袋都好重要。


真係要著長褲,要揀輕而透氣,亦要有彈性。
真係要著長褲,要揀輕而透氣,亦要有彈性。

風褸:免凍親免濕身 

香港天氣又濕又多雨,其實行山最好帶定一件風褸。選購時切記最好揀防水防風,一件衫可以遮風擋雨,而且有時行山行到好夜先走,日夜溫差大,一件風褸可以防風保暖。顏色方面宜選擇鮮色,例如紅、黃等,萬一不幸遇意外, 可以成為搜救關鍵,被人更容易發現,盡量唔好揀綠色,免得變成保護色就失去識別意義。

行山鞋:選擇多宜買大半碼

好多人以為行山最重係行山鞋,其實只係一半一半,畢竟如果係行一般水塘等路線,其實一對波鞋都好足夠。如果有心投入行山活動先買一對合適行山鞋吧,最緊要係抓地力,鞋底要防跣而有一定厚度,用作保護雙腳行碎石、斜路可用,而如果有機會行石澗或淡水地方,可以考慮防水,不過價錢就會貴一截。建議唔好揀高筒,無咁重無咁焗。買時最預大半個碼,因為行山時腳可能會比平時腫,所以千祈唔好買啱啱好Size。

有啲行山鞋唔單止功能好,同時可以作跑鞋之用。
有啲行山鞋唔單止功能好,同時可以作跑鞋之用。


行山鞋最好唔好揀高篙,無咁焗。
行山鞋最好唔好揀高篙,無咁焗。

背包:要多袋要防水

行山攜帶物品當然以輕便為主,一般唔需要大量裝備的話,一個普通背包已可,盡量要多袋而且物料要輕,可以揀比較多外袋,及有袋用嚟專放水樽位;比較專業少少可以揀防水或有雨套,以防突然落雨令袋中物品全濕。另外留意某啲背包貼背脊物料都會採用通風設計,咁就算行到出晒汗都唔會貼實個背包,好唔舒服又會整到成個背包一陣汗臭味。

遮:要輕兼防UV 

另一樣好多人忽略,就係要帶定遮。山上陽光非常猛烈,其實單靠帽未必可以遮到;一把太陽遮就可以防曬,免於中暑。太陽遮要輕,另外伸縮要細,可以摺到最小收埋落背包。當然留意物料係咪防UV防UPF。顏色建議揀回淺色,無咁吸熱。

行山帶遮其實非常重要,宜帶淺色。
行山帶遮其實非常重要,宜帶淺色。

行山杖:輕而有彈性

好多人覺得行山如果唔係太崎嶇,無需要用行山杖,但其實一支好嘅行山杖,唔單止幫大家上山落山保持平衡,對安全極為重要之外,一對行山杖會比平日慳75%力,對於新手嚟講非常重要。行山杖要揀夠輕,同時唔好以為愈硬愈好,反而要有彈性,咁先有御力作用。手柄方面宜揀直柄,易握唔跣手,手柄物料可揀水松,易吸手汗令手握得更隱。

其他:防曬太陽帽 缺一不可

行山最大安全隱憂,除咗係山勢險要之外,另外最危險又睇唔到嘅敵人,其實係中暑。所以上山必須帶防曬及太陽帽,防曬要揀防汗,SPF度要50度,建議大約最少1至2小時要補一次。太陽帽方面,一頂好嘅太陽帽可以防曬防熱,同時幫助人體散熱,物料要輕、快乾、防汗,夜晚仲有反光效果,容易於遠處可以識別,用作救援之用。


太陽帽可揀連後頸嘅,防止後頸曬傷。
太陽帽可揀連後頸嘅,防止後頸曬傷。

你可能還想看