李蘊入院︳14歲影性感相惹嘩然 會考4分讀菲國大學 嫁內地才俊未夠30歲生2個

同何超蓮及G.E.M份屬好姊妹嘅李蘊(Renee)，早前POST入院照被網民質疑係咪被老公家暴，後來Renee再post相交代因為脊椎腫瘤而要入院動手術，要瞓喺病床休養，總算真相大白。

30歲嘅李蘊淡出幾年相夫教子，童星入行嘅佢無咩作品大紅，但新聞唔少，次次都成為話題人物。

李蘊12歲就同陳曉彤（Hilda）及盧嘉寶（Carpo）組成少女團體Cream，但係成績平平，3年後解散。期間，當時14歲嘅李蘊被雜誌《壹本便利》邀請影濕身封面照，雜誌出街後影視處收到多宗投訴，李蘊媽咪及經理人分別指控內容不實及誤導。警方更介入事件，並起訴雜誌及總編觸犯兒童色情物品條例，但法官判罪名不成立。後來李蘊作個人發展，夠18歲就拍寫真，當中不乏性感造型。

另一單李蘊「話題之作」係關於學業。出道後要拍《四葉草3》同兼顧學業，2008年Renee會考放榜但成績未如理想，只有4分。經理人幫佢報讀菲律賓比力勤國立大學商科課程，但未有畢業。2015年傳媒踢爆國力書院係「文憑工廠」，李蘊承認當年係透過國力書院報大學，而捲入呢宗醜聞嘅蔡思貝都係呢間「學校」畢業生，係李蘊師妹。

2011年李蘊20歲生日當日，有傳媒爆出李蘊同年長15年嘅魔術師劉謙拍拖。外界以為二人大纜都扯唔埋，實情當時佢地因為TVB節目《魔法擂台》而撻著，Renee生日仲去台北搵男友過大日子。不過佢地冇正式承認戀情，而呢段關係未夠一年就玩完，但係起碼令台灣同內地觀眾都知邊個係「劉謙（前）女友」。

分手唔夠半年，再有傳媒爆李蘊同廣州金融才俊羅章冠拍拖，今次Renee就選擇公開戀情。拍拖3年幾後，24歲嘅李蘊宣布婚訊，半個月後更公布有喜嘅消息。同年5月中李蘊誕下大女紫晞，2018年8月再添一名兒子。婚後李蘊跟老公喺內地生活，間中同好姊妹何超蓮及G.E.M見面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！