【經歷四合四離】潘源良再婚 李麗珍決定要Be a Better Me

李麗珍（珍妹）與同佢一齊10年嘅前度男朋友潘源良，可以話係「有緣無份」。佢哋曾經3次分開又再復合，唔少人（包括佢哋自己）都覺得佢哋唔會再分開，點知到2016年佢哋第4次分開，今次佢哋不單止冇再復合，潘源良仲已經喺加拿大迎娶一個比自己細17年嘅女朋友Rita。

現時「重新振作」絕對係對珍妹嚟講最需要嘅事。2016年嘅分開，珍妹好單純咁以為好似之前分手咁，可能係一個習慣、一個冷戰後嘅經歷，點知今次竟然一去冇回頭！正當佢留喺加拿大用緊時間去治療情傷嘅時候，就見到潘源良再婚呢段新聞。佢睇到新聞後，當時同囡囡對望，完全唔識俾反應，腦裡完全空白，而且仲開始怪責自己，自責自己係咪做錯咩事，令到潘源良最終放棄自己。

珍妹因此事曾經一度抑鬱，要食情緒藥。但佢諗返轉頭認為係時間上嘅問題，當對方想結婚時自己未準備好。當自己覺得一切生活穩定，囡囡已經長大準備畢業時，對方又好似無乜表示。

佢覺得自己一直有好多好朋友陪伴，佢亦變得更好及更獨立。當下最緊要做好自己，就算知道自己已經年長，但仍然有人追求有人愛錫自己，仍然相信呢個世界有真愛。加油啊！珍妹！