茱莉亞羅拔絲大佬認叻「個妹有今日全靠我」 出自傳跪低認衰︳電影LOL

一家人一齊闖蕩演藝圈嘅例子唔少，影后茱莉亞羅拔絲就有個阿哥Eric Roberts同樣都係演員。68歲嘅Eric Roberts喺香港未必多人識，但原來拍過嘅影視作品高達7百幾套，以英語演員計排第4。今年係Eric Roberts投身荷里活50周年，佢最近推出名為Runaway Train: or, The Story of My Life So Far嘅自傳。

Eric Roberts其中一件「成名作」，係喺2018年接受Vanity Fair訪問嘅時候，豪言話如果唔係有佢，茱莉亞羅拔絲同自己個女Emma都唔會成為名人明星，仲話茱莉亞羅拔絲拍成名作《風月俏佳人》或多或少同佢有關。聽落相當抽水，語氣好似本地某位天后嘅屋企人……

事隨6年，Eric Roberts喺自傳中正式就呢番言論向茱莉亞羅拔絲公開道歉，話自己當時咁講相當愚蠢，又盛讚個妹非常有決心，即使唔係有個喺荷里活發展，都會有經理人發掘到茱莉亞羅拔絲出嚟。

但係轉個頭，Eric Roberts就話自己當日隻身到紐約闖蕩，示範咗俾個妹睇演員生活係咩一回事，假如茱莉亞羅拔絲繼續留喺老家，可能最後都係嫁個有錢人，生活同而家好唔同。其實呢頭道完歉，嗰頭就曲線講「阿妹你有今日都係我鋪好條路咋」，係咩玩法？冇錯就係宣傳手法，如果唔係你又點會知道Julia Roberts有個親生大佬都係演員呢？

更多電影文章

痛愛完成式／變形金剛初始篇／不羈騎士／望月／撞鬼遇到愛／JUNG KOOK: I AM STILL／人間蒸發株式會社︳電影LOL 今期睇咩戲

《未來戰士》有新發展 70歲占士金馬倫拍完《阿凡達》再拍廣島原爆故事︳電影LOL

《風林火山》預告片剪接師確認影片已完成 導演版本片長達6小時︳電影LOL

《小朋友齊打交》LF2港產遊戲拍大電影 古天樂天下一同試當真合製？︳電影LOL

Cola War 八十年代可樂大戰將拍成電影史匹堡做監製 收錄兩大品牌惡鬥故事︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！