葡萄友：「港女M」蛋糕 完美示範「如何賺港女錢」

相信大家都知美國過江龍蛋糕專門店「港女M」係人氣店，幾乎全日都大排長龍，當收費更加驚人，蛋糕最平要$750一個，一件就承惠$75。不過觀乎年多前開業至今仍然其門如市，唔通真係「港女錢最易賺」？就呢間蛋糕店嘅評語已經充份睇到港男港女大不同，幾乎10個港男有11個都話唔明點解咁貴，仲話同一般美心、東海堂差唔多；而港女呢，就通常都話好好食，仲話「無缺點，除咗貴」。其實姑勿論食物如何，但綜觀男女唯一共通評語，就係貴，性價比唔高，好食但唔值呢個價，而分別係男人唔會食，女人就明知唔值但會繼續食。甚至有男網民直言：「如果你女朋友鍾意食，真係恭喜你呀，100%集齊典型港女最愛：靚、好食、貴、排隊、呃Like。」

貴，唔係人人捨得食

其中一個虛榮要點，當「女士M」賣到成$75一件蛋糕仔，已經將好多唔捨得食嘅朋友仔排除在外，所以入得去消費都係表示自己「係，阿姐係有能力負擔起呢件蛋糕，吹咩？」好有成功感呀。

排隊，一定係好嘢

港女愛一窩蜂，愈多人排愈要試，香港人無嘢多，最多係時間，排隊嚟講時間成本對佢哋而言基乎係零。記得年多前第一日開張，尖沙咀要排2個鐘先食得到，仲要量買！至於可以排到隊入到去喇喎，當然係打咭呃Like為主，食蛋糕為次。

食牌子，唔係味道

首先將品牌變到非常Luxury，價錢要貴，食物要靚（唔代表好食），裝潢要美觀，造人龍造人氣，令一眾港女認為「食一件蛋糕要$75係正常嘅事」，最緊要係大家食完仲覺得自我感覺良好，Hashtag埋「對自己好一點」之類自High嘢就為之成功。