雅虎香港新聞 【鏡粉故事】爆買代言產品作慈善用途 姜糖合力應援「傳姜音」
【Yahoo 新聞・鏡粉故事系列報道】Mirror 掀起追星和爆買熱潮，網上熱傳姜濤歌迷爆買其代言的牙膏，數量足以砌成一座小山，蔚為奇觀。「牙膏山」背後，是一群姜糖被偶像激勵和療癒心靈﹑把這份愛轉化為慈善力量的故事。他們笑言任務是藉慈善「傳姜音」，「姜濤值得畀更多人見到」。
記者：Carmen C.
攝影記者：Davies, HLKP
上述「客廳中的黑人牙膏山」帖文獲 1.7 萬人讚好，來自「我老婆嫁咗比Mirror導致婚姻破裂關注組」。有網民嘆謂「呢鑊真係刷到 2046」，貼文的「前夫」當時急急解話，指這座牙膏山是其太太與一群姜糖合資購買，將轉贈香港失明人協進會。
姜濤四月初在IG呼籲，「今年我希望你們把應援集資，用來幫助身邊更多有需要的人…我們更應該傳遞我們的愛心和力量」，上述「前夫」的太太Fiona等一眾姜糖即以行動響應。Fiona接受《Yahoo新聞》訪問時說，捐贈「牙膏山」的過程並不轟烈奇情，亦非傾家蕩產購買產品，「每人只係夾幾十一百蚊就得」，亦強調購買物品時亦有深思熟慮認真配對，「唔會話買啲啤酒畀學校同老人家」。她們希望支持偶像之餘，亦可將這份愛送出去，遂著手了解那些機構需要協助，最終聯絡到上述機構。她更參與製作應援點字卡送予視障人士。
訪問當日，六名姜糖齊集Fiona家中，帶來大批應援物、近30隻姜濤公仔。記者甫抵達，背囊也未放下，姜糖們即急不及待介紹各式應援物和紀念品，口頭禪是「姜濤值得畀更多人見到」。
媽媽級姜糖：「其實我生得佢出」
不少受訪姜糖已為人母，有人尷尬笑著「其實我生得佢出㗎喇！」她們成為姜糖的理由各異：被其歌曲觸動﹑喜歡其性格﹑受家人影響等。阿V稱6歲兒子更早喜歡姜濤，他因而接觸音樂、學古箏，姜濤孝順和謙虛的形象也成為其榜樣。
「香港人仍然仲可以有夢想」
阿V尤其欣賞姜濤的作品《孤獨病》和《Dear My Friend》，前者講述抑鬱心情、後者講述姜濤的亡友，「佢唔單單係唱情歌，而係治癒咗好多人嘅心」，亦有助她走出喪父之痛。阿V對上一次投入廣東歌已是古巨基年代，「係因為佢聽返廣東歌」。Kris就感謝姜濤以多年的努力告訴大家：「香港人仍然仲可以有夢想」。
為了偶像，一眾姜糖都「學好多本身唔識嘅嘢，不停有好多第一次」，例如Fiona首次用軟件排版設計製作應援物；阿V則更願意嘗試新挑戰，「去學識咗揸大相機、執相」；AnnieC就指「喺IG點樣tag先可以有最大宣傳效用……其實都無諗過喺marketing上可以幫到手」。AnnieC指「大龍鳳」背後，大家只有一個目標，「就係推廣姜濤畀更多人認識，佢係值得所有人認識、所有人愛」。
香港失明人協進會副會長陳志剛表示，經過眾多粉絲的應援，社會更認識該會的工作、其社企餐廳生意亦有增加，更開始接收各式日用品捐贈。「佢捐得畀我哋就收，我哋就派」。陳亦強調購買物資前可先致電協進會，以便協調，「偶像帶動fans做到啲關心社會嘅事，好多謝佢哋，佢哋好鍾意偶像、偶像好愛佢哋，兩者加埋，佢哋都好愛香港。」
