陳浩民罕提舊愛佘詩曼 大讚奪視后實至名歸及唔介意合作

TVB劇集《狀王之王》即將於22日迎來大結局，查案劇情故事令觀眾印象深刻之外，多年無喺TVB亮相嘅陳浩民客串演繹角色「陳夢吉」，與宋世傑（王浩信飾）於公堂上舌劍唇槍亦令人驚喜。陳浩民於接受媒體訪問時，表示是次雖然只係得45分鐘公堂戲，但落力拍足4日，自己亦有加入一啲演《濟公》嘅元素，直言好好玩及唔夠喉。

陳浩民對上一部TVB劇集已經係2008年古裝劇《搜神傳》，佢其實曾經係TVB人氣小生，曾拍過《天龍八部》、《西遊記（貳）》、《封神榜》等多套經典劇集，2008年拍完《搜神傳》離巢並主攻內地市場，但當時有傳離巢原因係TVB人工太奀，與其不歡而散。陳浩民直言，今次拍攝《狀王之王》係基於總導演肥仔聰（林子聰），指二人多年來互相關照，有乜好嘢都會預埋對方。至於，與TVB之傳聞，陳浩民指當年喺外面無咁多工作，並強調無TVB就無佢，認為做人要飲水思源，所以呢次拍劇無講錢只係當聚舊，又指自己好鍾意演戲，只要有戲做，演乜都得。

對於曾拍拖4年嘅舊愛佘詩曼早前重返TVB拍攝《新聞女王》，又憑「Man姐」一角封后，陳浩民表示戥佢高興，並認為佘詩曼不嬲係女王，未試過失敗，奪獎係實至名歸；而佢自己就無睇電視習慣，只知《新聞女王》非常受歡迎。至於合作機會，陳浩民坦言日後先算，但唔介意合作，覺得拍戲都只係一份工作。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！