雅虎香港新聞 【離散香港記者系列】發掘港媒未關注角度 盼重返 2020 年前思考新聞方式
【Yahoo 新聞・離散香港記者系列報道】香港於世界新聞自由指數排名中，在一年間由第 80 位暴跌至 148 位，雖然候任特首李家超稱新聞自由「已經喺我哋嘅袋入面㗎喇」，但現實是有記者以行動表態，選擇離港成為離散一群，希望重拾從事新聞工作時免於恐懼的自由，並以離散記者身份，在海外繼續報道，紀錄身在香港的記者已經不能書寫的香港歷史。
家輝（化名）是前《蘋果日報》記者，在去年 11 月離港，「年中時見到再有同事被捕，唔知最終拉幾多人，嗰時亦覺得喺香港做記者條路已經完咗，如果想繼續做記者，唔值得留低。」他當時為盡快離開，選擇先到台灣落腳，希望再尋找機會申請移居其他國家。
雖然要離開香港這片土壤，但他當時已立志決定在海外仍要繼續做記者，「起碼想紀錄香港人喺海外嘅生活，寫流亡香港人嘅故事，去紀錄喺香港嘅記者已經不能書寫嘅香港歷史。」
自由身合作再經歷傳媒停運
初抵埗台灣，他即有機會以自由身記者身份，為其他香港傳媒採訪供稿，「當時覺得人在海外，仲喺香港出到報道，已經好滿足！」誰料如此合作關係轉眼已告終，「嗰間現時都摺埋（停運），感覺咩出路都冇晒，啲平台消失晒。」
他後來加入新成立的華文新聞平台，繼續撰寫包括海外港人關心的新聞和人物專訪等，同時也跟進香港新聞。如此模式，有點像他過去在報館的工作，雖未必是撰寫第一手新聞，但就能從已被香港傳媒報道的新聞中，找出值得跟進的角度，「可能人哋做得未夠好、未夠深入，就 highlight 番出嚟畀大家知。」
跟進疫情發掘港媒未關注角度
他舉例，在第五波疫情下，不少港人接受核酸檢測後，等待多天才會收到檢測結果，當時有不少官員的親人或司機、秘書確診，但這些官員中，有人最快可即日公布自己測試是陰性，「點解市民要等好多日？係咪有官民對待不公平情況？」家輝強調，無意批評香港的行家，「知道大家好努力，明白有困難，唔知係咪傳媒機構有其他考量啦」，而在新時代下，傳媒指出政府錯誤或被上綱上線，「大家一定會驚，最肯鬧政府嘅傳媒都冇晒，其他自然會擔心下一波會唔會針對自己，有報紙都加印段『免責聲明』，但大家要欣賞仲有記者繼續做。」
多得網絡世界，家輝說只靠電話已可聯繫不同訪問對象，更感謝他們就算知道是海外來電仍願意受訪，「覺得佢哋（受訪者）好勇敢。」另一方面，猶幸港府或公營機構仍會回覆查詢，故才能繼續撰寫報道。然而，他亦承認當中有限制，如缺乏現場感和親身經歷令報道失色，「疫情期間感覺最差，當時台灣好安全，自己完全感受唔到香港嘅慘況同恐慌，寫得自然唔夠貼地，只好搵香港朋友分享，但報道唔夠全面，覺得花好大力氣都唔會比自己喺香港寫得好。」
顧慮安全報道不敢具名撰寫
他現時每天大部分時間都是留意香港事，「好似唔知台灣發生咩事」；早上會由收聽香港的電台節目開始，又上網閱讀香港新聞，尋找可跟進的題材，撰寫的報道，讀者也多數是來自香港。
香港新聞自由今非昔比，家輝就直言在台灣很能感受那是個自由社會，例如在當地見到宣揚獨立的旗幟是生活之日常，「喺香港咪已經係禁忌，犯法囉。」但就算當地有著自由氛圍，他的記者工作仍要步步為營，有很多安全顧慮，要做足安全措施，「報道唔會敢出真名，亦感覺自己係離返回香港一日愈來愈遠。」他不諱言，家人曾在他離港時叮嚀「去到其他地方就唔好再搞咁嘅嘢」，「但自己心中知道，自己放唔低，知道係做緊有意義嘅事。」
他更道出另一個希望繼續為香港書寫新聞的原因：「你（自己）人在海外，但嗰班人（仍在香港的記者）仲敢繼續做，仲有勇氣面對挑戰喎，我都唔想放棄，只會更小心，盡量令自己身份保密，如果要處理再敏感題材，就再小心啲保障好自己。」
俄國緬甸記者也離鄉別井
其實在家輝眼中，新聞自由不過是「唔要自我審查」，更坦言自己目標不高，「做咗咁多年記者，搣唔甩個思考新聞方式，只係想返番去國安法前寫新聞嘅狀態，2020 年之前點寫新聞，家陣就點寫；喺海外就用番有自由嘅水平去諗新聞，無理由仲畀條紅線綁死。」而在海外不時要單打獨鬥，他說反令他沒有時間空間傷春悲秋，「但冇得一班人一齊做新聞就係唔開心。」
香港記者離開香港卻又繼續書寫香港，家輝說自己不可能從過去生活經歷及身份抽離，「自己專長就係寫香港嘢，脫離唔到，無可能喺海外寫當地本土事」，就算記者觸角及技巧猶在，如果不是香港，相信很好大機會考慮轉行。他又說，其實如俄羅斯及緬甸也有記者離鄉別井後，再書寫家鄉，反觀香港狀況已經較好，起碼港人使用網絡習慣更強，令離散記者透過網絡，可跟身在香港的大家拉近，「最少寫報道出嚟嘅效果仲感受到。」
