雅虎香港新聞 電影LOL︳美國獨立精神大獎 李政宰膺視帝 司儀台上爆粗X普京
年頭時份都係美國電影界頒獎禮季節，當地西岸時間星期日就有獨立精神大獎(Independant Spirit Award)頒獎禮。顧名思義，入圍電影同金球獎及奧斯卡當然有出入﹐不過2個主流頒獎禮近年聲譽麻麻，獨立精神大獎反而更有睇頭。同大家盤點一下頒獎禮部份焦點︰
香港觀眾最熟悉嘅《魷魚遊戲》只係有一個提名，但係入圍電視劇最佳男主角嘅李政宰就「一注獨中」成為視帝。李政宰未能到場，只係拍片致謝詞。今次係李政宰憑《魷》喺荷里活奪得嘅第2個視帝寶座，早前李政宰獲影視演員工會選為「連續劇最突出演繹男演員」。
上星期嘅演員工會大獎，多位出席影星以衣著及台上發言支持烏克蘭。今日獨立精神大獎頒獎台上仲激，司儀Nick Offerman及 Megan Mullally直情爆粗叫俄羅斯總統普京fxxk off，又話咁做先係解決現時局勢最快同最和平嘅方式，仲向住鏡頭舉中指！
憑CODA入圍奧斯卡最佳男配角嘅Troy Kotsur獲得獨立精神大獎最佳男配角，成為頒獎禮有史以來首位失聰得獎者。佢喺片中飾演失聰漁夫，因此致謝詞時感謝拍攝地點麻省Gloucester嘅漁業社群。上周嘅演員工會大獎Troy Kotsur亦獲獎。
演員出身嘅Maggie Gyllenhaal 自編自導兼監製嘅The Lost Daughter贏得最佳電影、最佳導演及最佳編劇，係頒獎禮上其中一位大贏家。Maggie Gyllenhaal 首次入圍最佳導演及最佳編劇就一擊即中，反而之前2次以演員身份入圍卻名落孫山。Maggie得獎後感謝金主Netflix，佢話「做獨立電影人，好少可會愛上負責融資嘅同事，除咗我。」in case你唔知，Maggie Gyllenhaal 係Jake Gyllenhaal 個家姐。
更多電影文章
電影LOL︳自編自導自己傳記片 Madonna親自出馬選角 女星入集訓營日操11個鐘搏中選
電影LOL︳聽候5年 韋家輝 x 劉青雲《神探大戰》內地4月上畫 預告片曝光
電影LOL︳荷里活大片廠相繼杯葛 《熊抱青春記》、《蝙蝠俠》抽起俄羅斯上映安排
電影LOL︳美國演員工會大獎 《魷魚遊戲》破紀錄奪3獎 眾星表態支持烏克蘭
電影LOL︳《尚氣》帶挈劉思慕片約不斷 將接拍真人版Barbie
電影LOL︳劉德華新片《紅毯先生》演過氣港星 同「侯賽因」31年後再次聚頭
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
