電影LOL︳DC終於搵到話事人 撬走Marvel《銀河守護隊》大腦

呢2個禮拜，一連講咗幾日片商華納同DC嘅人事變動，因為就算唔熟電影業界，呢單嘢當係扮工室政治花生咁睇，一樣有睇頭。（不如拍成一套戲啦）

話說DC嘅母公司華納新老細David Zaslav上場後，唔止腰斬已經拍好嘅《蝙蝠女》，仲多次批評DC影業，明言想要個好似Marvel掌舵人Kevin Feige咁嘅人才嚟睇檔。而DC呢頭剛剛送走高層Walter Hamada，今日就宣布搵到繼任人。據外媒The Hollywood Reporter報導，DC總裁職位將由Marvel電影《銀河守護隊》導演James Gunn及《水行俠》監製Peter Safran頂上，共同擔任主席及CEO職位。雖然職位一樣，不過職務唔同，James Gunn將主導DC電影創作方向，而Safran將處理日常營運。

華納暫時搵唔到第二個Kevin Feige，所以睇中食哂Marvel、DC兩家茶禮嘅James Gunn。理論上Marvel 同DC打對台，台前幕後盡量唔重疊，James Gunn係少數可以喺兩邊彈出彈入！

James Gunn幫Marvel 成功打造風趣幽默嘅超級英雄片《銀河守護隊》，18年被爆twitter陳年不當言論，一向政治正確嘅Marvel火速炒咗James Gunn，造就佢過檔DC接手重啟《自殺特攻隊》要務。最後因為得到《銀》一眾主角連署力撐兼搵唔到適合人選，結果又搵返James Gunn返去繼續執導《銀》系列 ！

就喺華納宣布James Gunn成為新任DC主席及CEO同時，Marvel就推出由James Gunn編劇及執導嘅《銀河守護隊》聖誕 Special 宣傳，特輯仲有Kevin Becon加盟。不過隨住James Gunn成為DC高層，Marvel、DC兩邊走應該成為絕響，《銀》系列怕且要物色其他人接手。

對於James Gunn接手DC影業，影迷反應兩極，一派擔心佢會將DC電影變哂做黑色喜劇，另一邊又寄予厚望由佢重整DC，不過可以肯定DC電影將會再次大改革。至於James Gunn有幾多創作自由暫為未知之數，因為佢上頭有集團CEO David Zaslav、電影部CEO及主席 Mike De Luca、Pam Abdy都唔易湊，佢地一上場就炒咗DC影業5個高層。無票房的話，怕且James Gunn有幾多創意都坐唔穩個位！

更多電影文章

電影LOL．今期睇咩戲︳黑亞當／獵戰／給自己的情歌／餘命10年／巴黎夜旅人間／劇場版 擅長捉弄人的高木同學

電影LOL︳The Rock成功爭取 亨利卡維爾正式宣布再演超人

電影LOL︳STAR WARS星球大戰新片有眉目？傳巴基斯坦裔女導演執導

電影LOL︳曾令《小丑回魂》勁賺20倍嘅男人 華納DC日裔高層走人

電影LOL︳The Rock 賣橋成功 黑亞當同超人crossover有望？

電影LOL︳正評勁過上集 Netflix《神探白朗》新片明益院線優先上映

電影LOL︳娃鬼大戰！新登場M3GAN 社交平台挑機寸Chucky 隨時建立娃鬼元宇宙

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！