雅虎香港新聞 【電影LOL】BTS新紀錄片 BTS: Global Takeover展現天團上位之路 ARMY必睇！
韓國天團BTS全球大紅，去到邊度開演唱會都一票難求，打破無數紀錄，多次獲邀到美國音樂頒獎典禮做表演嘉賓，改變業界生態，成就非凡！而家睇唔到演唱會，可以睇住電影止下渴，而自2018年起，BTS每年都有推出節錄自世界巡迴演唱會及幕後花絮特備片段嘅紀錄片。
2018年就有節錄THE WINGS TOURS片段而成嘅首部電影Burn The Stage: The Movie，2019年Bring the Soul: The Movie就紀錄咗佢咃Love Yourself世界巡迴12個城市開show片段，以及完show後慶功宴上分享個人感受等點滴，俾ARMY（BTS粉絲專稱）們睇睇舞台下嘅面貌。上年就有BREAK THE SILENCE: THE MOVIE，呢套再多啲感性，巡迴期間貼身追訪各成員，剖白個人感受。
咪以為呢啲花絮片段冇市場，Bring the Soul及Break the Silence喺香港上映時場場爆滿，戲院預售一開幾乎即時售罄！2020年除咗Break The Silence: The Movie，BTS原來仲有套BTS: Global Takeover嘅紀錄片。有別以往3套紀錄演唱會片段嘅電影，呢套唔係由BTS出品，觀眾層反而更闊，連非ARMY人士都睇得投入。
BTS喺英國有超高人氣，被譽為Beatles後最紅男團，更係首個於英國溫布頓球場開show嘅韓國團體。英國EM娛樂以英國媒體角度，紀錄咗佢哋由備受冷待嘅韓國小型娛樂公司旗下男團，一步一步成為國際天團，創下韓國音樂新高度嘅過程。BTS: Global Takeover將BTS成員嘅事業、人生起伏濃縮成1個鐘嘅紀錄片。
電影喺美國多個串流平台有得睇，台灣ARMY就可以4月入戲院欣賞。其實香港戲院受疫情影響停業多時，元氣大傷，可以考慮引入BTS: Global Takeover，相信除咗ARMY，其他觀眾都有興趣知道BTS如何打破語言、文化隔膜，成為全球icon。
更多電影文章
【電影LOL】台灣韓國公司互相買《想見你》《梨泰院class》版權 許光漢朴叙俊互換角色得唔得？
【電影LOL】內地賀歲檔大收 《唐人街探案3》破《復仇者聯盟4》紀錄
【電影LOL】周杰倫《不能說的秘密》拍韓國版 EXO D.O演男主角
【電影LOL】Amazon拍《史密夫決戰史密妻》劇集版 唔搵型男索女做主角？！
【電影LOL】反修例紀錄片《Do Not Split不割席》入圍奧斯卡紀錄短片十強
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
