顏國樑病逝︳《香港81》演市儈經紀深入民心 患癌入ICU太太為夫續命度過15日關口

資深演員顏國樑傳出因病逝世，享年71歲。消息獲顏好友、前TVB主持鄧英敏證實。鄧英敏受訪時表示，早前患癌嘅顏國樑近期多次出入醫院，佢本來想去探望，但因為等埋朋友於是改期，點知顏喺周六晚離世。鄧英敏打算同昔日《歡樂今宵》嘅同事開直播細數顏國樑嘅軼事。

顏國樑70年代加入香港電台成為播音員，後來於1981年加入TVB，經典作應該係處境劇《香港81》演市儈經紀陳積，顏講返當年陳積一角嘅入屋程度，令好多人都唔知佢姓顏！顏國樑於另一TVB長劇《季節》演主角鄧碧雲嘅大仔大Dee（唐家偉），劇中因為外遇而被飾演太太嘅林建明掌摑，呢一幕同樣令觀眾留下深刻印象。到90年代演出另一套處境劇《真情》，飾演蘇玉華嘅哥哥陳大勝。

後來顏國樑演過唔少劇集，包括《真情》、《皆大歡喜》及《十月初五的月光》等，到2008年約滿離開，轉做太極拳導師。2022年顏國樑現身TVB 55周年嘅台慶show《萬千星輝賀台慶》，唔少觀眾都聽到顏國樑聲線有變，完show後佢接受訪問解釋，自己患上聲帶鱗狀細胞癌，令佢發唔到低音，當時正接受化療。

顏國樑後來受訪透露，因為聲音沙啞而去睇醫生，檢查後證實患癌並開始做治療。由於政府唔包部份藥費，顏國樑要拎近40萬出嚟做醫藥費。顏國樑直言有壓力，因為政府提供嘅傷殘津貼只有2千幾蚊，根本微不足道，仲話「我TVB打工㗎咋以前」。顏國樑患癌後冇向人提及病情，亦無搵朋友幫手，直到現身台慶大家先至知。至於身體狀況，顏國樑話做完化療會好虛弱，周身骨痛，行路同講嘢都唔方便。

錢銀以外，顏國樑得病後試過3次因為腫瘤影響呼吸爭啲窒息。上月底顏國樑及其前藝人太太霍潔貞為梁思浩主持嘅TVB PLUS節目《直播靈接觸》做嘉賓講到「續命」嘅話題。顏國樑提到早前一度病重昏迷，更陷於生死邊緣15日。

霍潔貞憶述顏國樑入院時已經昏迷接受搶救，但醫生話情況隨時轉差，要送入深切治療部。為保老公性命，霍潔貞搵過唔同方法為老公續命，有朋友建議霍潔貞搵法科師父，於是佢去搵圈中好朋友請教，對方叫佢第二朝一早去濟公廟裝塔香，未來15日會係一個關。此外霍又將顏國樑平時抄嘅《心經》拎去火化。而顏國樑喺節目提到，昏迷期間見過有人喺病房度行來行去講電話，內容十分離奇，包括話「你俾人整蠱啊，俾人玩緊時差」；顏又指有兩個肥嘟嘟、大媽咁樣嘅「醫務助理」走埋嚟捉佢，仲記得對方話佢「你好曳呀」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！