黃美棋嫁人晒巨星合照相集 豪氣「吹喇叭」贏在場男士

童星出身的黃美棋尋日（6日）同主持男友鍾健威（Ray）拉埋天窗，五星級酒店筵開35席酒席大宴親朋。去飲嘅戲肉當然要數現場播出一對新人嘅成長歷程同相識經過，當中不乏黃美棋童星時期同多位天王巨星嘅合照，包括謝霆鋒、梅艷芳、古天樂、趙薇、邱淑貞同汪明荃等，簡直就係集郵天后！

黃美棋喺台上致詞時，亦表現感動：「睇到你哋每一位，就印證住我嘅成就，有唔同嘅公司，唔同嘅朋友，有中學同學，亦都有大學同學，有啲係專買機票返嚟，又有係專登改機票。」轉頭喺敬酒環節上，鍾健威被感動到多次落淚，不過嬌滴滴嘅黃美棋身上戴住至少六對龍鳳鈪，就展示反差一面，忽然變飲得之人，同林盛斌、周家怡等藝人敬酒時，就喺大家起哄下，一口氣飲咗半支紅酒，真係不得了。