AK江𤒹生與麻利同框現身日本緋聞再起 親自留言反擊︰我忍咗好耐

先後參加ViuTV《全民造星》嘅Tank（梁德忠）同方方（方芷欣）拍拖多年，因比賽而為觀眾認識。二人交往多年，今日終於有好消息，Tank喺社交網站宣布向方方求婚成功，仲分享同一大班朋友喺日本完成「求婚大作戰」嘅相。

感動以外仲有亮點，眼利網友一睇就見到，同Tank份屬友好嘅AK江𤒹生有份見證呢個重要時刻以外，同AK傳緋聞嘅前商台DJ麻利都喺大合照入面，而照片中除咗有Tank同方方以外，仲有2pair情侶，另外就係AK、麻利及2位Tank友好，令大家議論紛紛。

向來直腸直肚嘅AK，見到緋聞再次成為話題，即晚就喺fans TG群組入面回應，直指「同行就叫拍拖咩？」、「我同邊個做朋友亦有我自由」、「我做藝人唔代表你地可以干預我嘅交友圈子 唔好自己覺得咩加個故事就係」。AK更聲言對於外界討論佢同麻利關係「我忍咗好耐 一直唔出聲」、「由頭到尾都係你地自己幻想 然後仲要攻擊我朋友 我已經唔出聲」。至於同麻利咩關係，AK就話「我地係以family相稱 代表我地感情好好 有咩問題」。

麻利同AK嘅緋聞傳足2年有多，去年更被指二人一齊搬入西貢仲一齊放狗，AK更被發現手臂多咗個M字紋身，令緋聞更加似層層。而AK就回應話雙方只係好朋友，仲明言唔會擦出火花，而M字紋身只係代表爸爸。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！