BFF打卡下午茶 飄雪樂園/粉白花系主題

約閨蜜一齊聚會傾偈，點少得去靚靚餐廳嘆下午茶打卡呢？呢2間西餐廳就有飄雪樂園同唯美花系下午茶套餐，唔單只鹹甜點造型精緻有心思，味道亦好出色㗎，至啱同BFF慢慢食住傾偈談心～而家OpenRice有快閃折扣優惠，快啲約定姊妹一齊chill吓啦！

「飄雪樂園」二人下午茶套餐 DK Cuppa Tea

有意境又有童真嘅下午茶呀～呢個以飄雪為靈感嘅下午茶套餐，選用糖果粉藍色為主調，再加入樂園標誌性嘅旋轉木馬音樂盒作佈置，造型浪漫，音樂響起時令人好放鬆𠻹。

二人下午茶包括4款鹹點、9款甜品同棉花糖雲雨茶，而每款甜品更精心加入飄雪元素，好似榛子黑朱古力棒同杏仁朱古力，配上純白雪花圖案，好睇又好食；伯爵茶杯子蛋糕同伯爵茶馬卡龍則製成綠松石藍色，夢幻感十足，食落仲有淡淡佛手柑嘅清新香氣𠻹。

最後嘆返杯棉花糖雲雨茶，雲朵般嘅棉花糖置於熱伯爵茶上，慢慢融化成「雨雲」，為茶品增添幾分甜度同意境，設計好有心思！

DK Cuppa Tea

地址：上環新街市街19號地舖

「花漾盛放」下午茶 Garden Lounge

想體驗春日氣息嘅話，可以一試呢間酒店嘅西日風「花漾盛放」下午茶。靈感取自酒店前庭春天開花嘅節果決明樹，會綻放粉紅同白色花朵，吸引唔少人專程嚟打卡㗎！下午茶除咗有多款靚靚造型嘅日式鹹甜點，仲可以一嚐意大利雪糕品牌VENCHI嘅獨家限定口味——紅桑子玫瑰意式雪糕。套餐更同日本護膚品牌聯乘，惠顧下午茶就送護膚品喇～

送上三層架tea set之前，會先上日本甜粟米暖批作歡迎小食，安排貼心。4款鹹點啱晒鍾意海鮮嘅你，分別以北海道蟹肉、三文魚籽、小龍蝦同鮑魚入饌，鮮味突出而且配搭新鮮。甜點則以日本水果為主，其中蜜柑白朱古力慕斯同士多啤梨櫻花朱古力蛋糕賣相好精緻！

Garden Lounge

地址：中環紅棉路22號The Murray, Hong Kong酒店花園樓層

閨蜜限定 : 女生聚餐約會提案！（更多餐廳優惠按此）