【電影LOL】John Cena就辱華言論道歉幫到手《F9狂野時速》內地收2億美元

因為疫情打亂哂電影檔期，餓咗好耐終於開始有返荷里活商業鉅片上映，《F9狂野時速》上個月香港開畫大收旺場，累計票房超過3200萬港元！

唔講都唔醒起，《F9》有別以往放映周期，國際市場比美國本土先開畫，未計美國全球累積接近3億美元，單係內地就收咗2億美元票房，難怪主角之一趙喜娜（John Cena)失言「辱華」激嬲內地觀眾時，第一時間用中文拍片道歉，睇票房就知道歉有用！

《F9》終於上星期五喺北美地區開畫，根據The Hollywood Reporter數據，周末開畫票房錄得7000萬美元佳績，比《無聲絕境2》周末開畫票房4800萬美元多3000萬，成為自2019年《星球大戰：天行者崛起》後最高開畫票房電影。主角Vin Diesel知道《F9》全球大收時表示觀眾慢慢回歸戲院，feel good咁話！

雖然《無2》及《F9》票房成績不俗，可惜離疫情前嘅票房仲有段距離，亦唔係間間荷里活片廠都咁有信心用返傳統放映模式安排電影上畫。美國本土及海外市場採用不同放映策略，好似迪士尼會將部份電影戲院獨家上映，部份則戲院、Disney＋同步上映。好似7月嘅《黑寡婦》，美國觀眾可以選擇額外付費成為Disney＋Premier用戶喺串流平台睇，而華納美國直頭將2021年所有出品戲院、自家串流平台HBOMax同步上映！

票房成績要睇天時地利人和，好似嗰排疫情如何、觀眾有幾安心入戲院睇戲，甚至套戲有無IMAX、Dolby全景聲、4dx等版本都有影響。以《F9》為例，北美地區378個IMAX廳收到550萬美元票房，佔北美市場總數7.8％，入座率極高！

有數得計，為咗盡吸票房導致片期再執位，年度Sci-Fi鉅製《沙丘瀚戰》由原定10月1日改遲至10月22日上映，目的為咗同10月8日開畫嘅《007生死有時》拉開距離。2套戲特效場面相當吃重，IMAX巨幕體驗如無意外大收旺場，間開啲唔駛同《007》爭IMAX廳，延期都合理，不過美國改至22日上映，變相Timothée Chalamet自己打自己，因為同一個星期除咗《沙》仲有由佢主演、Wes Anderson執導嘅《法蘭西諸事週報》上映！

《沙丘瀚戰》香港未定片期，應該唔會又咁啱同《法蘭西諸事週報》打對台啩？

更多電影文章

【電影LOL】今期睇咩戲 盛夏友晴天／極地冰劫／情迷電影節 ／白色巨鯊／除暴

【電影LOL】三大導燒2億美金！內地史上最貴電影《長津湖》參加今年康城影展

【電影LOL】白人冇份！迪士尼搵拉丁裔新人Rachel Zegler主演新版《白雪公主》

【電影LOL】Edan@MIRROR首拍賀歲片有勁敵 黃子華拍《飯戲攻心》加入戰團力爭3連霸

【電影LOL】傳朴敘俊加入拍新一集《Marvel隊長》演半人半小強Marvel Boy

【電影LOL】香港重口味導演之王 院線搞桂治洪驚世港產爆片選

【電影LOL】驚慄網劇The Swarm 木村拓哉加盟全英語演出

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！