【電影LOL】白人冇份!迪士尼搵拉丁裔新人Rachel Zegler主演新版《白雪公主》

·2 分鐘文章

「魔鏡,魔鏡,邊個係世界上最靚?白雪公主……」童話故事耳熟能詳,多年來間間片廠都拍過「白雪公主」。唔駛數到咸豐年代,2012年仲未做《艾蜜莉在巴黎》嘅Lily Collins喺《魔鏡.魔鏡:白雪公主決戰黑心皇后》扮過白雪公主;2016年《吸血新世紀》嘅Kristen Stewart喺《白雪公主之魔幻復仇》都做過,雖然2位飾演嘅公主比起原裝公主硬淨同打得,唔再柔弱,不過外型上大致符合「白雪公主」肌膚勝雪嘅設定。

迪士尼擁有大批童話公主版權,先後翻拍成真人版電影《美女與野獸》、《仙履奇緣》等,「貝兒」、「灰姑娘」分別由Emma Watson及Lily James飾演,2套電影大收旺場,其他公主亦陸續改編成真人電影,最新包括《白雪公主》,並由《蜘蛛俠:驚世現新》導演Marc Webb執導!

迪士尼一直好俾力跟貼時代,所以連童話主角都回應美國種族多元議題嚟選角,早前《小魚仙》(The Little Mermaid)鐵定由非裔女歌手Halle Bailey飾演,同原著白人型像大不同。《白雪公主》亦將由拉丁裔新人Rachel Zegler主演。

Rachel Zegler可謂荷里活影壇怪物級新人,芳齡20歲嘅佢無任何幕前演戲經驗嘅情況下,被大導演史提芬史匹堡睇中成為《西城故事》女主角,大讚其歌喉了得!《西》仲未上映,已經確定會參演DC嘅《沙贊!2》,跟手又獲選成為新版《白雪公主》!有幾多新演員可以一出道就做女主角,仲要套套大片?

雖然迪士尼高層力撐Rachel,話睇過《西》試片,對佢表現驚為天人,「白雪公主」不二人選!《西》同《沙2》都係大片,不過全部未正式上映,觀眾對佢零認識,根本唔知佢有咩能耐,所以選角消息一出,網友反而較訝異「白雪公主」由「白雪雪」變成拉丁琥珀膚色,夾硬為種族多元改原著設定!

迪士尼為咗回應「種族多元」而cast有色人種做「白雪公主」,舉動係與時並進?抑或摧毀經典原著?

更多電影文章

【電影LOL】Edan@MIRROR首拍賀歲片有勁敵 黃子華拍《飯戲攻心》加入戰團力爭3連霸

【電影LOL】傳朴敘俊加入拍新一集《Marvel隊長》演半人半小強Marvel Boy

【電影LOL】香港重口味導演之王 院線搞桂治洪驚世港產爆片選

【電影LOL】驚慄網劇The Swarm 木村拓哉加盟全英語演出

【電影LOL】《狂舞紐約》談情說愛又講多元文化 演員膚色唔夠多元化捱轟

【電影LOL】賤TED回到少年時?《賤熊30》拍前傳劇集版

【電影LOL】政府修訂電檢條例配合國安法 敏感政治片上映有難度

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能