【電影LOL】賤TED回到少年時?《賤熊30》拍前傳劇集版

10年前由麥克華堡主演嘅《賤熊30》,憑住一隻麻甩、爛口、咸濕又幼稚,識行識走嘅熊公仔,笑住講述男人成長與友情點滴,成功喺全球錄得5.5億美金票房。成績咁好當然開拍續集,2015年推出《賤熊2》,熊仔Ted大個仔結埋婚兼想生仔,可惜被認定為「物件」無權搞人工受孕,決定搵律師平權,當中繼續笑料百出,可惜第2集反應一般,全球票房大跌一半得2.1億美金!

男主角麥克華堡幫電影做宣傳時講過,《賤》講男人成長,故事長拍長有,輕輕鬆鬆可以拍20集咁話。可惜事與願違,電影《賤熊》拍得2集因為續集票房不如預期就被Universal收埋,無再見過賤熊Ted!

當年仲未有新冠疫情、串流平台競爭又無今時今日咁激烈,戲院票房成為開拍與否嘅關鍵。事隔6年,串流平台開到成行成市,對內容需求量激爭,只要故事稍有知名度同賣點都成為各台必爭對象,熊仔Ted亦因此有得重出江湖,成為美國NBC旗下串流平台Peacock最新劇集!

據The Hollywood Reporter報導,Peacock將會開拍10集《賤熊》前傳真人動畫劇集(Live Action),導演兼創作人Seth MacFarlane 9成9會回歸為賤熊Ted監製兼聲演。劇集故事時間設定早過電影,意味男主角有機會係青少年或者係廿幾歲後生仔,總之避免同電影版男主角麥克華堡做比較……亦可以名正言順搵過平啲嘅演員主演!

Peacock高層表示對Seth MacFarlance好有信心,認為Seth有能力創造受歡迎角色。又係嘅,雖然《賤熊2》票房未如理想但都收成2億幾,加上Seth喺電視方面表現確實比電影更出色。佢有份創作及監制嘅成人動畫The Family Guy由1999年播出至今仍然大受歡迎,長做長有,另一套由佢創作嘅動畫劇集American Dad 2005年出街做到依家都仲做緊。話唔定《賤熊》變成電視劇集反而長做長有!

更多電影文章

【電影LOL】政府修訂電檢條例配合國安法 敏感政治片上映有難度

【電影LOL】今期睇咩戲 《遺愛》《無聲絕境2》《漩渦:恐懼鬥室新遊戲》《小馬王:毛駒無束》《東京蒼穹下》《她和他的戀愛花期》

【電影LOL】鄭中基0片酬支持《遺愛》紀錄一宗兇案點影響2代人

【電影LOL】MIRROR ERROR仔仔電視攻上大銀幕 Edan呂爵安拍吳君如鄭中基賀歲片

【電影LOL】《殺神John Wick 4》搵甄子丹拍奇洛李維斯一齊殺敵 仲有零演戲經驗歌姬加盟

【電影LOL】多年拍檔為錢決裂 張藝謀6年第3度告張偉平

【電影LOL】影壇新貴Timothée Chalamet拍《朱古力獎門人》前傳 貪佢似後生版Johnny Depp?

【電影LOL】林家楝0片酬拍新片《手捲煙》江湖味濃之作導演陳健朗只係30歲

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!