【電影LOL】MIRROR ERROR仔仔電視攻上大銀幕 Edan呂爵安拍吳君如鄭中基賀歲片

·2 分鐘文章

Mirror、Error粉絲應該好開心,因為班仔仔工作不斷,睇完演唱會又有節目跟住上,啱啱睇完《Error自肥企劃》意猶未盡,依家又可以日日追《調教你Mirror》,依家仲紅到超出電視圈,進軍大銀幕!

早前Error嘅Dee哥同梁朝偉、劉德華合作拍攝億元鉅製《金手指》,另一成員193就同Mirror嘅Anson Lo齊齊拍攝新片《假冒女團》,同場仲有蘇皓兒、Super Girls嘅Heidi以及《造星3》嘅陳葦璇及Alina。Mirror嘅Anson Kong就同吳千語拍愛情喜劇《忽然心動》,由正片去到青春喜劇都有呢班仔仔嘅身影,非常厲害!

而綜藝節目做得相當出色嘅呂爵安(Edan),憑住獨特喜感被吳君如相中拍賀歲片《闔家辣》!電影由吳君如監製兼主演、鄒凱光做執行監製,新晉導演鄭晉軒負責執導及編劇,故事以導演親身經歷改編而成,吳君如表示鄭向佢講述疫情期間家中發生嘅事,仲越講越好笑,因而決定將事件拍成電影。

電影剛剛喺屯門舉行開鏡儀式,暫時未有太多角色及故事情節公布,只係知君如同Edan會飾演一家人,同片嘅家人仲有梁詠琪及鄭中基,佢地繼2012年《嫁個100分男人》後再次合作。近年鄭中基不計片酬演出以支持新導演作品,好似今個星期上映嘅《遺愛》,今次《闔》未至於零片酬,只係象徵式收友情價!

《闔家辣》都幾多小插曲,吳君如話同鄭中基唔用Whatsapp溝通,唯有將劇本親自送到鄭中基住所交由看更轉送,結果鄭中基喺看更手中「攞個劇本返去睇睇」,認真搞笑!

吳君如又透露為咗新戲cast咗好多人,仲話Mirror咁紅,如果唔願試鏡就打消念頭,點知對方願意試鏡仲咩都肯做又敢言,經理人花姐試鏡時仲細細聲表示「唔得唔駛夾硬用」,態度良好、試鏡表現又ok,就係咁,Edan成為下年賀歲檔要員,大放笑彈!

更多電影文章

【電影LOL】今期睇咩戲 《濁水漂流》《詭屋驚凶實錄3:魔旨》《荒野狂屠》

【電影LOL】《殺神John Wick 4》搵甄子丹拍奇洛李維斯一齊殺敵 仲有零演戲經驗歌姬加盟

【電影LOL】多年拍檔為錢決裂 張藝謀6年第3度告張偉平

【電影LOL】影壇新貴Timothée Chalamet拍《朱古力獎門人》前傳 貪佢似後生版Johnny Depp?

【電影LOL】林家楝0片酬拍新片《手捲煙》江湖味濃之作導演陳健朗只係30歲

【電影LOL】疫情打亂007上映日期導致財困 美高梅筍價賣盤俾Amazon

【電影LOL】《梅艷芳》傳記片預告曝光 影壇大亨因為梅姐一次幫忙決定開拍

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!