【電影LOL】多年拍檔為錢決裂 張藝謀6年第3度告張偉平

·3 分鐘文章

據內地電影網站《時光網》報導,張藝謀導演以「股東損害公司債權人利益責任糾紛」向北京互聯網法院入稟,起訴舊拍檔張偉平及其北京新畫面影業有限公司,今次已經係張導6年內第3次告張偉平!

張藝謀同張偉平因為鞏俐而認識,1996年時張導缺乏資金,無辦法開戲,本身做生意嘅張偉平出錢俾張藝謀拍《有話好好說》。《有》當年票房麻麻連成本都收唔返,不過張偉平睇好張導決定繼續投資,自此2人16年合作無間,之後張導交出《一個都不能少》、《我的父親母親》等國際影壇大放異彩嘅作品。

2002年2人合作嘅《英雄》內地收咗2.5億人民幣,海外票房都收到7.5億人民幣,刷新內地票房新紀錄!張導拍藝術片、商業片都取得空前成功,兼成為「點石成金」導演,同佢合作過嘅「謀女郎」都一戲大紅,而家港人熟悉嘅章子怡、周冬雨、倪妮等都係「謀女郎」出身!

不過2人嘅關係亦隨住越嚟越大嘅票房數字而變壞,去到2011年《金陵十三釵》後正式決裂!話說張偉平言論出位,經常發表偉論搶佔新聞版位,夠哂宣傳之效,同時又得罪好多人!為《金》受訪就狂講倪妮床戲,話要有咁上下激情觀眾先會收貨,其實場戲係因為張偉平嘅干預而硬加,仲要攞嚟大群宣傳,令張導非常不滿,有感創作受制!

不過真正導火線都係「錢」字作怪,合作多年2人都無正式簽合約,結果條數極混亂,繼而開始雙方互相廝殺局面。首先張偉平2012年出律師信宣布收返周冬雨、倪妮等謀女郎嘅管理權;之後張導又告張偉平拖欠《三槍拍案驚奇》票房分成1500萬,跟手張偉平反撃指張導生活奢華,新畫面公司出錢為張導買咗多架名車又幫佢啲仔女俾哂國際學校學費,上訴後獲判只需付張導246萬餘額,不過張偉平一直拖數!

雙方不停你告我、我告你咁過咗6年,不過最爆都係據聞當年張偉平策劃,爆出張藝謀導演「超生」仔女而被罰款748萬一事。雖然當事人否認,不過張藝謀連出《宿命:孤獨張藝謀》一書都狂批評張偉平,仲要一單官司未完又再告多一單,𠴱種意難平同怨憤,又唔似單單為咗1500萬片酬分賬喎,真相得2位當事人先知。

不過打官司似乎無影響張導拍片,作品一部接一品,《懸崖之上》上畫無耐,7月又有愛國電影《狙撃手》,仲未計講文革但因為「技術原因」而遲遲未能上映嘅《一秒鐘》!

更多電影文章

【電影LOL】今期睇咩戲 《濁水漂流》《詭屋驚凶實錄3:魔旨》《荒野狂屠》

【電影LOL】影壇新貴Timothée Chalamet拍《朱古力獎門人》前傳 貪佢似後生版Johnny Depp?

【電影LOL】林家楝0片酬拍新片《手捲煙》江湖味濃之作導演陳健朗只係30歲

【電影LOL】疫情打亂007上映日期導致財困 美高梅筍價賣盤俾Amazon

【電影LOL】《梅艷芳》傳記片預告曝光 影壇大亨因為梅姐一次幫忙決定開拍

【電影LOL】又有明星得罪內地網民 今次係F9 John Cena 「趙喜娜」講中文致歉

【電影LOL】Marvel 重要之作《永恆族》預告片曝光

【電影LOL】《神探白朗》續集星級卡士夠拍幾套戲!Edward Norton未埋位已經被網民估係兇手

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能