【電影LOL】《梅艷芳》傳記片預告曝光 影壇大亨因為梅姐一次幫忙決定開拍

·3 分鐘文章

近年睇咗唔少外國天皇天后傳記片,由樂隊Queen、Elton John、David Bowie到快將面世嘅Madonna、Cher雪兒傳記片,終於有屬於香港天后嘅傳記片《梅艷芳》!

「香港女兒」梅艷芳聲色藝俱存,80、90年代風靡萬千香港人,以百變形象及鮮明台風於歌壇獨領風騷,電影成就亦相當出色,其主演嘅《胭脂扣》、《審死官》、《半生緣》、《金枝玉葉2》、《鍾無豔》等電影至今仍然受歡迎,成為影迷一睇再睇之選。

梅艷芳
梅艷芳

投資開拍《梅艷芳》嘅安樂電影公司老闆江志強先生憶述「2003年的某日,阿梅約我見面,希望我能為她拍一部傳世的電影,當時我和導演張藝謀特地在《十面埋伏》中為她設計了一個角色;可惜最後因為她的離去,無法實現她的遺願,多年來我一直惦記着她未圓的夢;因與梅姐的交情;我仍然希望圓她臨終前的願望,同時填補最後《十面埋伏》合作不成的遺憾!促成開拍電影《梅艷芳》就是我的初衷。」

江生亦有提及梅姐貴為當紅明星,唔介意為當時仲係小公司嘅安樂宣傳宮崎駿嘅日本動畫《天空之城》,令佢非常感激梅姐仗義幫忙。電影《梅艷芳》除咗因為要完成好友梅姐遺願,同時亦希望將梅姐「由荔園的小歌星躍升為天后的傳奇,她拼搏至最後一刻的精神,永不言棄的信念」,為香港打氣!

梅姐嘅仗義性格一直廣為娛樂圈盛讚,此時此刻,相信唔少人極懷念香港曾經有一位敢言、女俠氣慨嘅天后,而佢嘅生平亦非常值得被流傳下來。電影開拍消息傳咗好耐,近日終於見到以梅姐生前最後演唱會婚紗造型為題嘅前導預告及海報!

荷里活星拍名人傳記片往往上身地似,坊間一直傳言由模特兒王丹妮飾演梅姐,不過電影公司現時仍未正式確認主角身份,相當神祕!要演繹天后難度確實高,除咗外形仲要神韻皆似,而且梅姐台上獨有嘅壓台風釆源於佢生活歷練,要複梅艷芳製亦相當困難,對任何演員嚟講都係一大挑戰,亦令人對即將上映嘅《梅艷芳》非常期待!

暫時預告片聽到嘅旁白就同梅姐本人聲線有一段距離,不過相信安樂影片江生及導演梁樂民會交出一套對得住梅姐、對得住香港人集體回憶嘅《梅艷芳》!

更多電影文章

【電影LOL】又有明星得罪內地網民 今次係F9 John Cena 「趙喜娜」講中文致歉

【電影LOL】Marvel 重要之作《永恆族》預告片曝光

【電影LOL】《神探白朗》續集星級卡士夠拍幾套戲!Edward Norton未埋位已經被網民估係兇手

【電影LOL】歌手傳記片拍極仲有 片商敲定拍雪兒生平

【電影LOL】奧斯卡得獎作《醉美的一課》拍美國版 里安納度做主角 會唔會變《醉爆伴郎團》?

【電影LOL】《老友記》25週年特集下周推出 Lady Gaga BTS客串陣容勁到喊

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能