【電影LOL】《神探白朗》續集星級卡士夠拍幾套戲!Edward Norton未埋位已經被網民估係兇手

·3 分鐘文章

《神探白朗:福比利大宅謀殺案》成本4000萬美金就集齊「007」Daniel Craig、「美國隊長」Chris Evans、最新「邦女郎」Ana de Armas、《月光光心慌慌》Jamie Lee Curtis及已故《仙樂飄飄處處聞》男星Christopher Plummer等多位巨星,全球錄得3億美金票房,成績理想。

早前Netflix用超高價4.5億美金天價購入《神探白朗》第2、3集獨家播放權,俾得咁多錢,當然希望有回報,劇組亦不負眾望開始駛錢,第2集確定移師希臘拍攝,以及保證出動大量明星主演!

既然係《神探白朗》系列,飾演神探嘅Daniel Craig繼續擔正,同佢過招嘅演員包括《不死喪軍》、《銀河守護隊》大隻男星Dave Bautista,2人先前已經喺《007:鬼影帝國》合作過,仲因為拍007打鬥場面受傷,估唔到Daniel做完007轉投「神探」系列,繼續同Dave Bautista同場,今次《神》應該唔駛埋身肉搏啩!

《搏撃會》、《飛鳥俠》男星Edward Norton確定加盟《神2》,Edward多次獲得奧斯卡金像獎及金球獎提名,演技備受肯定。入行多年嘅佢對角色有要求,角色不論大小最緊要有戲做,近年密密參演Wes Anderson作品,今次接得《神2》相信角色有返咁上下有趣!唔少美國網民笑稱未睇戲就覺得Edward Norton係兇手,認真搞笑!

女角方面亦相當吸引,憑Marvel劇集《汪達與幻視》大反派女巫跑出嘅Kathryn Hahn亦會加盟,Kathryn以往多以喜劇角色示人,包括香港都有上映嘅《C奶同學會》,最後竟然因為反派角色跑出,真係估佢唔到!《NASA無名英雄》、《顫.役.前》女星Janelle Monáe確定加入,近年由歌手轉型至演員,戲路越嚟越廣闊,好奇佢喺《神2》將會擔任咩角色。

星級陣容又點止咁少人,最新公佈主角人選仲有憑One night in Miami獲提名奧斯卡最佳男配角嘅Leslie Odom Jr以及愛情喜劇天后Kate Hudson!Kate出道多年密密拍無停手,可惜《新娘愛鬥大》之後好似無咩代表作,今年剃頭拍Sia電影Music,不過套戲由選角開始爭議不斷,IMDB更錄得3.1分劣評,唯有寄望《神2》可以幫佢翻身!

《神探白朗:福比利大宅謀殺案》咁成功,觀眾對第2集自然期望更高,相信個星級陣容陸續有嚟!

更多電影文章

【電影LOL】歌手傳記片拍極仲有 片商敲定拍雪兒生平

【電影LOL】今期睇咩戲 《F9狂野時速》玩哂 仲有日本好戲《間諜之妻》

【電影LOL】奧斯卡得獎作《醉美的一課》拍美國版 里安納度做主角 會唔會變《醉爆伴郎團》?

【電影LOL】《老友記》25週年特集下周推出 Lady Gaga BTS客串陣容勁到喊

【電影LOL】外媒勁眼利 中央台一幅圖睇出 Marvel新片《尚氣》《永恆族》可能被內地封殺

【電影LOL】瘦到背脊見骨!彭于晏減磅拍《熱帶往事》演變態殺人犯

【電影LOL】被指白人主導兼恐同 電視台、影星齊齊杯葛金球獎 湯告魯斯退還獎座

【電影LOL】玉女Lily James演90年代波神 還原荷里活明星性愛片流出事件

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能