【電影LOL】Marvel 重要之作《永恆族》預告片曝光

·3 分鐘文章

全球新冠疫情反反覆覆,相信唔少觀眾都有抗疫疲勞,剛剛上映嘅《F9狂野時速》票房高開就知大家有幾渇睇超級鉅製。停擺多時嘅電影業亦開始展開重啟活動,迪士尼CEO Bob Chapek就講明唔想再延後《黑寡婦》映期,未來將會靈活應對,戲院、線上串流同時互補,對香港觀眾絕對係一大喜訊!

迪士尼密密展開漫威電影宇宙第4階段宣傳活動,早前推出《尚氣與十環幫傳奇》預告片後,啱啱又推出《永恆族》前導預告片。同《尚》唔同,《永》預告片開宗明義講明發生於《復仇者聯盟4》之後。

其中一幕眾人飯聚時討論「依家美國隊長同鋼鐵奇俠都唔係度,由邊個帶領復仇者?」,《權力遊戲》男星Richard Madden飾演嘅Ikaris仲話佢唔介意做!雖然明顯係笑位多過伏筆,不過唔見咗隊長同Tony,聽落都有啲心酸!

「永恆族」隱身地球7000年以上,一直引領人類進化,就算世界大戰甚或《復4》嘅滅世之戰,佢哋都唔會干預,今次佢咃唔再隱身,預視有比魁隆彈指間毀滅宇宙一半生命更大劑嘅事發生!

趙婷依家貴為金像導演,令其執導嘅《永恆族》更加矚目,早前漫威主腦Kevin Feige爆響口話《永恆族》少用綠幕、電腦特效拍攝,多用實景,預告片果然見到好多日出日落美景。暫時條片未見到「永恆族」嘅敵人,又大部份都係文戲片段,唔知雙方爭鬥場面會點拍?話哂引到隱身千年嘅「永恆族」現身,個「災禍」應該要有返咁上下震撼!

《尚氣》及《永恆族》皆以華裔演員做主角,陳靜就比劉思慕好彩得多,至少無被批評外型。陳靜憑《我的富豪男友》Astrid一角走紅後,片約不斷,仲成為首位出現係2套漫威電影嘅演員,喺《Marvel隊長》做完外星人,升呢做「永恆族」首領,同Richard Madden合演相愛幾世紀嘅情侶,戲份多過霸氣十足嘅Angelina Jolie及Salma Hayek多多聲!

早前有傳《尚氣》及《永恆族》因為辱華而遭內地封殺,睇迪士尼嘅宣傳攻勢似乎未受傳聞困擾,將會如期上映,正常都無理由因為一個地區而打亂自己部署足10幾年嘅計劃,全球都等緊漫威電影宇宙第4階段囉!《永恆族》將於11月上映。

更多電影文章

【電影LOL】《神探白朗》續集星級卡士夠拍幾套戲!Edward Norton未埋位已經被網民估係兇手

【電影LOL】歌手傳記片拍極仲有 片商敲定拍雪兒生平

【電影LOL】今期睇咩戲 《F9狂野時速》玩哂 仲有日本好戲《間諜之妻》

【電影LOL】奧斯卡得獎作《醉美的一課》拍美國版 里安納度做主角 會唔會變《醉爆伴郎團》?

【電影LOL】《老友記》25週年特集下周推出 Lady Gaga BTS客串陣容勁到喊

【電影LOL】外媒勁眼利 中央台一幅圖睇出 Marvel新片《尚氣》《永恆族》可能被內地封殺

【電影LOL】瘦到背脊見骨!彭于晏減磅拍《熱帶往事》演變態殺人犯

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!