【電影LOL】影壇新貴Timothée Chalamet拍《朱古力獎門人》前傳 貪佢似後生版Johnny Depp?

·2 分鐘文章

《以你的名字呼喚我》主角Armie Hammer被前度指控性虐、強姦,形象一夜插水,連帶所有工作被抽起或易角,連累《以你的名字呼喚我》續集開拍無期。《以》導演Luca Guadagnino親口証實,續集開拍計劃無限期押後,另一主角主角「甜茶」Timothée Chalamet因此空出一大個工作檔期!

Timothée Chalamet自《以》走紅後片約不斷,工作排到密密麻麻,形象、外型同演技都有返咁上下嘅佢成為荷里活搶手貨,今年排住隊上映就有超級大製作、改編自科幻小說嘅《沙丘瀚戰》,以及鬼才導演Wes Anderson嘅新作《法蘭西諸事週報》。雖然大家好鍾意佢喺《以》嘅演出,不過續集拍唔成,好在佢都仲有大把片約喺手!

最新消息Timothée Chalamet將會演出《朱古人獎門人》前傳Wonka,飾演王卡衛(Willy Wonka)!有關Wonka主角人選一直有好多傳聞,據聞《星聲夢裡人》男星Ryan Gosling、「閃電俠」Ezra Miller及《韓索羅:星球大戰外傳》男星Donald Glover等曾經競逐Wonka一角,不過電影公司屬意由廿幾歲年輕男演員飾演,最後變成「蜘蛛仔」Tom Holland及「甜茶」Timothée Chalamet之爭!

華納於2004年推出由添布頓執導、Johnny Depp主演嘅《朱古力獎門人》,電影大收旺場!最後角色落入Timothée Chalamet手,唔知同2004年版本有無關係?因為「甜茶」有幾分Johnny Depp年輕時嘅影子,早前佢夥拍雲露娜維達以《幻海奇緣》造型拍廣告,十足十Johnny Depp後生版咁!搵佢拍前傳,飾演年輕王卡衛都幾連戲!

Wonka將會以音樂劇形式登場,係Timothée Chalamet首次又唱又跳嘅演出,故事講述王卡衛成立朱古力工廠前嘅故事。原版故事中佢同父親Dr Wonka關係麻麻,前傳可能會著墨更多父子相處點滴。電影搵咗《柏靈頓》系列導演Paul King執導,佢拍嘅《柏靈頓2》曾經係爛蕃茄影評網唯一一套100%好評嘅電影,由佢主理嘅Wonka會唔會同《柏》一樣咁溫馨?

不過《柏》fans就慘豬啦,因為Paul King要拍Wonka所以唔可以再執導《柏靈頓3》!

更多電影文章

【電影LOL】林家楝0片酬拍新片《手捲煙》江湖味濃之作導演陳健朗只係30歲

【電影LOL】今期睇咩戲 《黑白魔后》《我的印度男友》《軍情諜報》《情約時分秒》《靈慾咒怨》

【電影LOL】疫情打亂007上映日期導致財困 美高梅筍價賣盤俾Amazon

【電影LOL】《梅艷芳》傳記片預告曝光 影壇大亨因為梅姐一次幫忙決定開拍

【電影LOL】又有明星得罪內地網民 今次係F9 John Cena 「趙喜娜」講中文致歉

【電影LOL】Marvel 重要之作《永恆族》預告片曝光

【電影LOL】《神探白朗》續集星級卡士夠拍幾套戲!Edward Norton未埋位已經被網民估係兇手

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能