【電影LOL】《殺神John Wick 4》搵甄子丹拍奇洛李維斯一齊殺敵 仲有零演戲經驗歌姬加盟

奇洛李維斯(Keanu Reeves)主演嘅《殺神》系列大收歡迎,憑住爽快動作場面,用一枝鉛筆都夠大開殺戒嘅乾脆俐落,票房一集比一集高。去到《殺神John Wick3》全球大收25億港元,高過前兩集加埋,咁好成績,電影公司鐵定開拍第4及5集,不過受疫情影響,拍攝進度受阻,呢排終於郁返!

《殺》嚟到第4集要搞啲新意思,寫咗頭3集嘅編劇Derek Kolstad今集唔再參與,改由《鐵血戰士:血獸進化》、《刺客特攻47》Michael Finch負責,一向寫開動作片嘅佢,幫《殺神4》寫動作場面應該無難度。

近日仲宣佈咗演員陣容,導演將會起用日裔歌手兼模特兒澤山璃奈(Rina Sawayama)。日本出世英國長大嘅Rina喺音樂圈簿有名氣,音樂風格結合流行音樂、R&B及New Mental再溝hiphop,風格獨特!

Rina同「樂壇大姑媽」Elton John合作出過單曲,專輯《Sawayama》錄得超過2億播放率,仲要係劍橋高材生!導演Chad Stahelski睇中Rina中西融合、極具個性嘅表演而邀請零演戲經驗嘅Rina加盟,大銀幕處女作就可以夥拍奇洛李維斯,認真幸運!

而另一主角就係我哋「宇宙最強」甄子丹!佢會於《殺神4》中飾演奇洛李維斯好友,同John WIck一樣係殺手仲有好多共同敵人,睇角色設定應該會同奇哥一齊聯合殺敵,個畫面可以想像夠哂刺激!

據聞導演Chad係甄子丹fans,睇過哂丹爺嘅作品,好欣賞佢嘅動作演出,而《殺4》監製Iwanyke表示決意邀請甄子丹加入《殺4》,相信佢可以為電影帶嚟更多動感及爆發力,能夠落實合作非常興奮!

甄子丹打入荷里活,拍親都係大製作:《幽靈刺客2:變種復活》、《俠盜一號:星球大戰外傳》、《3X反恐暴族:重火力回歸》及早前上映嘅《花木蘭》,套套戲份都有返咁上下。丹爺決定加盟,除咗製作班底夠誠意外,相信《殺4》角設及故事都夠吸引!

《殺神4》將會於柏林、巴黎、紐約及日本等幾個地方取景,只要拍攝不受疫情影響進度,預計《殺神4》將會於下年5月上映!

更多電影文章

【電影LOL】多年拍檔為錢決裂 張藝謀6年第3度告張偉平

【電影LOL】今期睇咩戲 《濁水漂流》《詭屋驚凶實錄3:魔旨》《荒野狂屠》

【電影LOL】影壇新貴Timothée Chalamet拍《朱古力獎門人》前傳 貪佢似後生版Johnny Depp?

【電影LOL】林家楝0片酬拍新片《手捲煙》江湖味濃之作導演陳健朗只係30歲

【電影LOL】疫情打亂007上映日期導致財困 美高梅筍價賣盤俾Amazon

【電影LOL】《梅艷芳》傳記片預告曝光 影壇大亨因為梅姐一次幫忙決定開拍

【電影LOL】又有明星得罪內地網民 今次係F9 John Cena 「趙喜娜」講中文致歉

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!