【電影LOL】《狂舞紐約》談情說愛又講多元文化 演員膚色唔夠多元化捱轟

·2 分鐘文章

2小時歌舞連場嘅音樂劇真係好適合夏天睇,尤其依家因為疫情飛唔到,一套將紐約拍到五彩繽紛又活力四射嘅電影,正好用嚟慰藉一下想旅行嘅心情,講緊係今個星期四上映嘅《狂舞紐約》!

電影改編自獲得東尼獎嘅同名音樂劇,由風靡全球賣座百老匯音樂劇《Hamilton》才子林曼紐米蘭達 (Lin-Manuel Miranda)創作。正因為《狂》嘅成功,令米蘭達立足百老匯,造就機會創作大受歡迎嘅《Hamilton》,電影由《我的超豪男友》導演朱浩偉 (Jon M. Chu) 執導,以《舞出真我》系列起家嘅佢,拍起歌舞片手到拿來!

故事設於紐約華盛頓高地,男主角Usnavi(《星夢情深》安東尼拉莫斯 飾演)努力經營家族留下的小酒館,用血汗積蓄懷著憧憬,希望一日重返父親老家多明尼加共和國經營小酒館;女神Nina(Lesile Grace飾演)入讀人人豔羨嘅名牌史丹福大學,偏偏又覺同自身文化有衝突,2個人情路兜兜轉轉,過程充滿又唱又跳,激情歌舞,睇到熱血沸騰!

《狂舞紐約》唔止談情說愛,年輕活力咁表面,仲講咗種族、何謂家等議題。故事聚焦嘅社區以拉丁裔為主,大部份都係移民後代,好似男主角Usnavi明明美國土生土長大,卻始終覺得自己似外人。一心努力儲錢想返多明尼加,隨住故事發展,Usnavi明白真正「家」嘅意義。

創作人米蘭達喺自己嘅Twitter提及20歲前因為有感主流媒體中見唔到拉丁文化,所以決定創作《狂舞紐約》。估唔到近日電影上映後,卻因為被美國觀眾詬病電影演員膚色「白」,戲中唔夠深膚色嘅非洲拉丁裔演員而頻頻見報,搞到米蘭達要出文道歉,保證以後作品會考慮周全啲!

暫時未知「演員膚色唔夠多層次」有幾影響套戲票房,只係知電影北美首週開畫票房略遜預期,不過影評分數數甚高嘅《狂》,或者有望好似另一套音樂劇《大娛樂家》咁越戰越勇,票房越做越高。

「種族多元」香港觀眾未必有切身感受,不過有時創作太政治正確就失去咗思考、娛樂嘅空間。不如好好享受下電影講堅持夢想、永不放棄有幾勵志,又或者欣賞下幕前演員位位落好多心機,唔靠借位、夾口型真唱真跳有幾堅!

更多電影文章

【電影LOL】賤TED回到少年時?《賤熊30》拍前傳劇集版

【電影LOL】政府修訂電檢條例配合國安法 敏感政治片上映有難度

【電影LOL】今期睇咩戲 《遺愛》《無聲絕境2》《漩渦:恐懼鬥室新遊戲》《小馬王:毛駒無束》《東京蒼穹下》《她和他的戀愛花期》

【電影LOL】鄭中基0片酬支持《遺愛》紀錄一宗兇案點影響2代人

【電影LOL】MIRROR ERROR仔仔電視攻上大銀幕 Edan呂爵安拍吳君如鄭中基賀歲片

【電影LOL】《殺神John Wick 4》搵甄子丹拍奇洛李維斯一齊殺敵 仲有零演戲經驗歌姬加盟

【電影LOL】林家楝0片酬拍新片《手捲煙》江湖味濃之作導演陳健朗只係30歲

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能