【電影LOL】三大導燒2億美金！內地史上最貴電影《長津湖》參加今年康城影展

內地史上最貴製作費嘅《長津湖》確定參加今年康城影展！電影由陳凱歌、徐克、林超賢聯合監制兼執導，可以同時請3位大導演合作，單睇排頭都知係超級鉅製。電影取材自抗美援朝戰爭第二次戰役中的一場戰役─長津湖戰役，槍林彈雨場面極度燒錢，據報《長》用咗2億美金拍攝，根據外媒The Hollywood Reporter紀錄，比同為戰爭片奧斯卡得獎作品《1917：逆戰救兵》（9500萬美元）及《鄧寇克大行動》（1.5億美元）仲要高！

要對得住天價製作費，《長津湖》卡士搵嚟內地吸金王「戰狼」吳京、《少年的你》易烊千璽飾演親兄弟，另外仲有男人味濃嘅胡軍及《無心法師》韓東君主演。《戰狼2》單喺內地狂收50億人民幣，成為內地最高票房電影，拍科幻一樣得，《流浪地球》大收46億人民幣，連外媒都知吳京票房吸金能力有幾強。

電影由中國博納影業出品，老闆于冬表示《長》一開始就知道電影難拍，必需要集齊高手共同打造，於是搵嚟陳凱歌、徐克同林超賢3位導演，拍足200日共同磨合拍出完整嘅故事，溝通過程似打仗。幾位台前幕後出席記招時不時互戴高帽，易烊千璽拍攝時整傷軔帶，就算行唔到依然繼續拍攝，獲吳京大讚「前途無量」！

易烊千璽確實片約不斷，《長》之外佢亦有份主演另一套由劉偉強執導嘅愛國電影《中國醫生》。主演嘅《少年的你》獲奧斯卡最佳國際影片提名，《長津湖》又會於參加康城影展，算係邁向國際市場！

比起進軍康城，媒體對《長》票房預測更有興趣，話哂幾位主要演員有票房保證又有人氣，幕後主理又有3位大導演，加上「中國英雄」題材喺內地非常受落，按道理應該會大收特收，取代《戰狼2》最高票房地位擦新票房新紀錄。不過都唔係無隱憂，通常聲勢越大期望越高，越容易有負評。好似另一套愛國電影《金剛川》上映前聲勢強勁，一樣有吳京坐陣，可惜評價麻麻，雖然埋單都收到10億，不過同《戰狼2》50億比，可謂差天共地！

《長津湖》內地預計10月1日上映，到時就知吳京超唔超越到自己嘅票房紀錄。

更多電影文章

【電影LOL】今期睇咩戲 盛夏友晴天／極地冰劫／情迷電影節 ／白色巨鯊／除暴

【電影LOL】白人冇份！迪士尼搵拉丁裔新人Rachel Zegler主演新版《白雪公主》

【電影LOL】Edan@MIRROR首拍賀歲片有勁敵 黃子華拍《飯戲攻心》加入戰團力爭3連霸

【電影LOL】傳朴敘俊加入拍新一集《Marvel隊長》演半人半小強Marvel Boy

【電影LOL】香港重口味導演之王 院線搞桂治洪驚世港產爆片選

【電影LOL】驚慄網劇The Swarm 木村拓哉加盟全英語演出

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！