【電影LOL】Marvel 晒冷預告片 預視未來5年MCU有咩大片 《永恆族》片段首度曝光

經過多番改片期後，Marvel Studios漫威終於定下Marvel電影宇宙第4階段作品嘅上映日期，仲啱啱推出預告片，好有心咁剪輯MCU過去10年著名場面配合未來計劃，大有承先啟後嘅意味。

預告片大賣「家人」情懷，又剪入《復仇者聯盟4》首日上畫戲院內觀眾超high真實反應，相信全球觀眾都一樣期待疫情過去，戲院坐滿人齊齊睇Marvel片嘅熱鬧場面！

預告片中唔少得有今年上映嘅《黑寡婦》、梁朝偉同劉思慕主演嘅《尚氣與十環幫傳奇》，亦終於首次見到另一期待之作《永恆族》片段！

《永》由憑《浪跡天地》成為奧斯卡金像導演嘅趙婷執導，Angelina Jolie、《屍殺列車》馬東石、《權力遊戲》Richard Madden、Salma Hayek及《我的超豪男友》陳靜(Gemma Chan）主演，開拍以嚟相關消息唔多，剩係知個cast好勁，依家終於見到片段，感覺有別以往睇開嘅Marvel電影。

MCU大腦Kevin Feige就好滿意趙婷嘅拍攝技巧，較早前接受訪問時透露《永恆族》因為趙婷堅持實境拍攝而用少好多綠布幕電腦特效，起初Kevin都半信半疑，直至睇到成品後，佢仲特別抽幾段無執過嘅原片俾迪士尼高層睇，勁讚日落、薄霧等實境場面靚到不得了！

Kevin仲透露《永恆族》如果要㨂領軍人物，一定係由陳靜飾演Sersi一角。漫畫中Sersi接近神，擁有可以將人轉化成不同生物、形式嘅強大力量，佢亦係1976年Kirby原著漫畫中最早登場嘅「永恆族」角色，MCU將會多一位超級英雌！

另一女英雌《Marvel隊長》續集將會以片名The Marvels孖住Ms Marvel於下年11月登場，而《黑豹》續集定名為Black Panther: Wakada Forever，已故Chadwick Boseman飾演嘅「黑豹」唔會重新選角，《黑2》將以紀念Boseman而拍攝。

預告片中最驚喜一定要數MCU落實重啟《神奇4俠》，想當年「美國隊長」Chris Evans係其中一位「神奇4俠」，事隔多年佢可以考慮下做完「美國隊長」做返「霹靂火」Johnny Storm喎！

MCU漫威宇宙第4階段電影 最新上映日期

《黑寡婦》7月

《尚氣與十環幫傳奇》9月

《永恆族》10月

《蜘蛛俠：不戰無歸》12月

《奇異博士2》（Doctor Strange: In the Multiverse of Madness）2022年3月

《雷神奇俠4》（Thor: Love and Thunder）2022年4月

《黑豹2》（Black Panther: Wakanda Forever）2022年7月

The Marvels 2022年11月

《蟻俠3》（Ant-Man and the Wasp: Quantumania）2023年2月

《銀河守護隊3》2023年5月

《神奇4俠》待定

更多電影文章

【電影LOL】花姐嘅男神 許光漢新片《你的婚禮》票房鍊贏張藝謀

【電影LOL】《正義聯盟》導演新片 Army of The Dead 一班友為咗5千萬迎戰幾萬喪屍

【電影LOL】今期睇咩戲《真．三國無雙》《金錢帝國：追虎擒龍》《是夜屍了》《在星空盡頭等你》《腿》《讀心叛變》

【電影LOL】真·三國無双 ︳日本遊戲界神人親筆信力讚「非常逼真」 關羽呂布出「無双」幾秒戲搞足1年

【電影LOL】奧斯卡賽後花生 趙婷點解變趙薇？頒獎禮收視跌一半 尹汝貞答記者「我唔係狗」！

【電影LOL】梁朝偉現身 《尚氣》首支預告出爐一面倒負評 網友彈劉思慕唔靚仔

【電影LOL】Amazon一次過開拍5季《魔戒》劇集版 Season1成本已經36億！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！