邱士縉跳唱新歌〈Drunk in Love〉爆肌展現完美體態 挑戰尺度MV造型Sexy登場

繼MIRROR演唱會中與 Jeremy 演繹〈Fever〉爆肌演出後，邱士縉 Stanley 朝成熟男人味、又帶少少性感的曲風方向發展，推出第二首個人跳唱單曲〈Drunk in Love〉，MV造型更是Sexy到底，Hot到爆燈。〈Drunk in Love〉說的是一個人飲到有少少醉意時的狀態 ，Stanley道：「同填詞人T-Rexx傾嘅時候，會覺得一個人飲到有少少Tipsy（醉意）望住一個女仔嘅時候，會放大對佢嘅感覺，對方一舉手一投足，例如簡單撥頭髮，都會覺得好靚好Sexy，我哋就係想創造一個咁樣嘅氛圍嘅歌。」

Stanley都愛杯中物，不過好少會飲到斷片；人生中唯一一次斷片經歷，是發生在出道之後，Stanley分享道：「出道之後，參加好兄弟婚禮，佢嘅大學同學不停向我敬酒，結果我喺好勁嘅六星級酒店大堂嘔，超級失禮，然後仲要由兄弟抬我返屋企，中間過程係點樣返到屋企我係完全唔知，但一個鐘頭後我就醒返。」

Stanley 在〈Drunk in Love〉MV中飾演一位臨時演員，角色要扮飲酒，但男女主角不停NG，結果NG到道具飲品都飲清光，結果要飲真的酒水，這時候Stanley變得帶點醉意，進入了幻想嘅空間。這是一個滿有劇情的MV，但Stanley卻未能過足戲癮，他解釋道：「因為拍MV要顧住自己個樣，又要顧及角度，諗嘅嘢多過演戲，平時演戲就只需要投入去演，但拍MV要喺鏡頭前面呈現一個好靚嘅自己，所以演得唔夠爽，唔可以好投入角色之中。」

Stanley要在MV中顧及造型實在無可厚非，因為幾套衫都能秀出完美體態，性感非常！Stanley表示：「今次MV中空多啲，性感有少少Deep V，因為啱啱過咗演唱會仲Keep到身材，又同花姐有討論過尺度去到邊，但當然冇演唱會尺度咁大只係著褸啦！但都Deep V了！其實主要因為身形仲喺度，留個倩影，唔好嘥啦！呢個都係我其中一個叻嘅地方，俾大家睇下啦！」