韓國洗腦神曲《晚安大小姐》熱潮不斷韓星爭相模仿 紅到香港藝人挑戰 姜濤化身「姜老師」贈口訣

近期一首《晚安大小姐》神曲造成全球轟動，社交平台充斥「#晚安大小姐DanceChallenge」嘅Cover，唔少港日韓台藝人都玩埋一份，例如MAMAMOO頌樂與玟星、Super Junior希澈與神童、《九龍城寨之圍城》「城寨四子」 、MIRROR姜濤、Jeremy李駿傑以及Frankie陳瑞輝等等。日前，姜濤、Jeremy、Frankie組成「米姜皮」Cover大熱《晚安大小姐》，姜濤更表情多多，相當盞鬼。

姜濤表示第一眼睇到隻舞就愛上咗，仲搵嚟師妹COLLAR成員Gao沈貞巧、Ivy蘇雅琳、Winka陳泳伽、Marf邱彥筒和Day許軼一齊跳《晚安大小姐》，玩得好開心。姜濤於社交平台分享短片，包括最後版本與原版。從原版影片中睇到，姜濤化身「姜老師」，教大家《晚安大小姐》嘅口訣跳舞：「打右邊 打左邊 拍拍，鞠個躬 轉個圈上下上下 上下上下，瞓覺 指，頂頂頂頂頂頂 玩 手機，頂頂頂頂頂頂 瞓 覺 覺 咀咀咀咀咀咀 咀～～～～左右左右，擺個pose」，一班粉絲都話生動有趣，笑到肚痛。Marf留言：「速學，funnnn，多謝你啲口訣」，Jeremy亦留言多謝COLLAR陪佢哋玩：「有五位大小姐俾我地拉住拍呢條片，辛苦曜のじじ」。

《晚安大小姐》主唱係韓國雙人組合ASMRZ，成員包括YouTuber「NEEDMORECASH」和TANAKA，MV模仿日本執事主題，並以第一人稱視角拍攝，將聽眾當成只顧熬夜玩手機唔瞓覺嘅大小姐，由兩位執事溫柔提醒和跳舞哄大小姐早啲瞓覺，當中「呀咧呀咧」歌詞搞笑洗腦，加上舞步簡單，因而引起熱潮。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！