【電影LOL】主角位位演得唱得 新版《灰姑娘》玩轉舊橋 搵黑人男星演仙女教母！

童話故事久唔久就翻拍一次，耳熟能詳嘅故事確實易吸客。2015年迪士尼跟足原著嘅翻拍真人版《仙履奇緣》，由後來拍Emily in Paris 走紅嘅Lily James主演。無論個造型到劇情都似足主題樂園，非常夢幻，《仙》不負眾望大收旺場！

最近美國串流大台Amazon Prime翻拍《灰姑娘》，講述灰姑娘同繼母及2個繼姐一齊生活，平時做牛做馬服侍全家，為咗改善生活環境，灰姑娘決定創立自家服裝品牌「Dress by Ella」，親自設計及手繨裙出售，不過去到市集無生意之餘仲俾人笑佢妙想天開！為咗識多啲人，佢決家參加城堡ball識下有錢人，繼母當然留難整到佢無裙可著！

好彩仲有精靈教父幫手，用魔法變出馬車及禮服，宴會上一心想搵富婆客嘅佢偏偏比王子睇上，到底嫁個有錢人定做事業女強人？

有別於迪士尼版，今次Amazon Prime注入大量新元素，首先搵嚟樂壇拉丁小天后Camila Cabello做「灰姑娘」，一向性感惹火嘅佢於戲中唔駛再扮斯斯文文嘅公主，轉而成為追求自己事業嘅勤奮女性！近日公佈嘅預告片，Camila呢個「灰姑娘」行為豪爽、講嘢又快，似睇《歌舞青春》多過童話公主！

另一大改動就係精靈教母唔再係慈祥婆婆，改由百老匯黑人男星、次次行紅地氈造型都成為話題嘅Billy Porter飾演！戲內Billy𠴱look繼續亮晶晶、閃bling bling，搶鏡過「灰姑娘」好多吓！不過最正都係加入好多流行gag，譬如故事舉足輕重嘅玻璃鞋，「灰姑娘」問教母對鞋著到腳痛有無得搞搞，教母抵死回句「魔法都有限制，搞唔掂！」，係！高跟鞋喺任何時間地點都著到腳痛！

Amazon Prime版「灰姑娘」歌舞連場，除咗Camila同Billy都係唱得之人外，仲搵嚟唱《冰雪奇緣》主題曲Let it Go唱到街知巷聞嘅Idina Menzel做繼母；拍親戲都唱歌嘅名嘴James Cordan亦有客串，而飾演皇帝嘅「前任007」Pierce Brosnan早於《媽媽咪呀！》開過金口。雖然同原著故事有出入，不過位位都演得唱得，唔知新版觀眾又受唔受落呢？

Amazon Prime串流服務無開香港地區，觀眾反而受惠，因為新版「灰姑娘」好大機會會喺香港戲院正式上映。

更多電影文章

【電影LOL】今期睇咩戲 幻險森林奇航／詭老／採魂邨／聽見歌 再唱／長相屍手

【電影LOL】動物們連環不幸事件？Edan呂爵安首度配音《反轉方舟動物團》

【電影LOL】《鬼同你住》－鬼恐佈啲，定係喺香港生活恐佈啲？

【電影LOL】《黑寡婦》串流戲院同時上架影響收入 Scarlett Johansson 告迪士尼

【電影LOL】真正「大叔的愛」 BL劇《昨日的美食》11月上畫 睇戲學煮餸冧仔！

【電影LOL】ERROR為催淚日本動畫《鱷魚君最後的100天》配音 入場笑定喊好？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！