【電影LOL】被睇死後立誓 發達唔益阿媽 名導塔倫天奴堅找數冇養家

金像導演昆頓塔倫天奴確定開拍《標殺令3》，影迷期待電影更多細節，但暫時導演未有透露更多詳情，只係接受訪問時講過，有意搵返《標殺令》女主角奧瑪花最參演。《標2》已經係2004年嘅事，事隔17年唔知奧瑪花曼仲有幾好身手，如果成事的話最開心一定係班影迷！

不過近日導演做咗個podcast訪問，宣傳《從前，有個荷里活》小說版，原本係想多啲人知小說比電影有更多情節，故事更完整。不過外國影視媒體熱烈轉載嘅唔係小說內容！有咩勁過佢新作動向？原來昆頓塔倫天奴喺訪問中講咗件兒時同媽媽相處嘅往事，雖然年代久遠，不過導演仲未嬲完，記仇記到依家！

事緣佢學生時代已經立志做電影編劇，就算返學上緊堂仍不忘寫作，日寫夜寫埋頭苦幹向目標進發，不過佢媽媽就唔多欣賞佢嘅作家夢，仲冷嘲熱諷「你個微不足道嘅作家夢？一早玩完！」（this little writing career that you’re doing? That shit is fxxking over!)，據聞伯母其實只係唔like佢上堂唔專心，不過語氣重咗，結果少年昆頓塔倫天奴嬲到震！

導演憶述當時嘅佢立誓，如果將來編劇事業有成，佢一毫子都唔會分俾阿媽，唔駛旨意佢會買車買樓請去旅行云云！聽得出佢當年有幾谷氣！主持人Brian Koppelman接住追問導演有無守住自己嘅誓言，佢爽快又肯定咁答「有！」，仲話除咗幫過阿媽交過1次稅後就無再俾過錢媽媽！

呢段對話熱爆影視網，因為估唔到金像大導演咁記仇！主持有落下嘴頭話因為伯母嘅「激勵」成為昆頓塔倫天奴嘅動力，間接成就佢今日嘅事業，仲勸導演送層樓俾伯母。不過昆頓塔倫天奴唔係咁睇，佢就覺得為人父母應該對自己嘅言語負責，要承擔返對仔女冷言冷語嘅後果！

其實昆頓塔倫天奴又講得幾有道理，父母應該支持仔女發展自己才華及追尋夢想，實際幫唔到都唔需要打沉佢嘅信心及意志，只不過世界得少數人好似導演咁可以堅持立場，用理智對自己父母。我估佢媽媽都無諗過因為多年前一句重言，對個仔咁大打撃，就算今日名成利就都未能放低芥蒂！

更多電影文章

【電影LOL】今期睇咩戲 自殺特攻／鬼同你住／女人街，再見了／中國醫生／BLACKPINK THE MOVIE

【電影LOL】奧運過後繼續撐運動員 《媽媽的神奇小子》展現蘇樺偉跑步人生

【電影LOL】冇題材手遊都殺！Netflix將「食雞game」PUBG拍成動畫

【電影LOL】主角位位演得唱得 新版《灰姑娘》玩轉舊橋 搵黑人男星演仙女教母！

【電影LOL】動物們連環不幸事件？Edan呂爵安首度配音《反轉方舟動物團》

【電影LOL】《鬼同你住》－鬼恐佈啲，定係喺香港生活恐佈啲？

【電影LOL】《黑寡婦》串流戲院同時上架影響收入 Scarlett Johansson 告迪士尼

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！