【電影LOL】奧運過後繼續撐運動員 《媽媽的神奇小子》展現蘇樺偉跑步人生

·3 分鐘文章

今屆奧運港隊表現出色,勇奪1金2銀3銅佳績,全城歡騰,好耐未試過咁興奮,香港選手亦得到大量市民關注!隨住奧運閉幕,賽事熱情過後,希望香港觀眾繼續關注及支持運動員,今個星期即將上映嘅《媽媽的神奇小子》以殘奧金牌得主蘇樺偉為藍本創作,較早前做緊優先場嘅《媽》好評如潮,好多媽咪級觀眾仲睇到眼濕濕!

由尹志文執導《媽媽的神奇小子》講述蘇樺偉 (梁仲恆 飾) 剛出世便被診斷患上黃疸病導致腦部受損,註定一生將會是一個弱聽與四肢痙攣的殘疾人仕,即使能逃過鬼門關,往後的人生只能依靠別人去照顧。蘇韓小貞 ─ 蘇媽(吳君如 飾) 在危急關頭堅持搶救偉仔,她決定即使兒子到了八十歲還是不能走路,都誓要以她這副老骨頭背著兒子一起走下去。

奇蹟就在蘇媽的堅持下發生了,偉仔不止逐漸長大,在蘇媽的鐵腕手段訓練下學會了走路,更被發掘出跑步的天賦。偉仔由少年時開始加入殘障人士田徑隊,隨著兩母子一起不斷的奮鬥,偉仔其後成為香港家傳戶曉的「神奇小子」─ 在1996年殘障運動會為香港帶來歷史性的第一金,以及在2008年的北京殘奧會拿到中國主場的第一面金牌,更刷新了「男子二百米」的世界紀錄!

當偉仔攀上運動員生涯上的最高峰,繞場接受鳥巢內九萬名觀眾的祝賀時,他的眼睛一直沒離開看台上那位一生支持著他的母親,從來沒有忘記贏每一面金牌的初衷。

電影搵嚟梁仲恆、馮皓揚及蔡天諾分別飾演成年、少年及童年蘇樺偉,3人都係電影初哥,梁仲恆本身為舞台劇演員,首次拍電影為角色落足苦工,觀察蘇說話方式及肢體動作,努力換嚟出色表現,仲得到本尊認證大讚好似!馮皓揚飾演少年版,開拍時只得14、5歲,亦無其他演出經驗,效果同樣驚為天人,連梁詠琪睇完都大讚做得好,以為佢真係殘障。而小演員蔡天諾只得4歲,本身不良於行嘅佢面對長時間拍攝,表現專業,其中一場戲被飾演蘇媽嘅吳君如狂鬧並無退縮,順利完成拍攝,認真叻仔!

「你走得比人慢,但跑得比人快」係蘇樺偉跑步生涯寫照,亦喺數年前接拍嘅廣告中出現,當時有人批評蘇媽幫兒子接廣告明星化,睇咗《媽》就明白強硬嘅蘇媽多年來一直處處為兒子生活打算,戲內對白「我返去跑步,每個月得3000蚊政府津貼」、「我依家唔係運動員,係速遞」、「好快大家就唔記得邊個係蘇樺偉」,係對白同時又係現實寫照,運動員生涯非常殘酷。

睇戲感動過後,最希望係香港嘅職業運動員得到更好嘅待遇及尊重,唔再需要於生計及運動訓練之間掙扎。近年香港觀眾重拾對本地影視嘅興趣,近月上映嘅多部港產片証明,香港無論幕前幕後都有優秀嘅年輕人才,希望佢地有更多機會發揮才華!

更多電影文章

【電影LOL】今期睇咩戲 自殺特攻/鬼同你住/女人街,再見了/中國醫生/BLACKPINK THE MOVIE

【電影LOL】主角位位演得唱得 新版《灰姑娘》玩轉舊橋 搵黑人男星演仙女教母!

電影LOL】動物們連環不幸事件?Edan呂爵安首度配音《反轉方舟動物團》

【電影LOL】《鬼同你住》-鬼恐佈啲,定係喺香港生活恐佈啲?

【電影LOL】《黑寡婦》串流戲院同時上架影響收入 Scarlett Johansson 告迪士尼

【電影LOL】真正「大叔的愛」 BL劇《昨日的美食》11月上畫 睇戲學煮餸冧仔!

【電影LOL】ERROR為催淚日本動畫《鱷魚君最後的100天》配音 入場笑定喊好?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能