香港5大吉列牛推介 A4黑毛和牛吉列牛、黑松露吉列牛

酥脆又充滿牛脂嘅吉列牛又有邊個唔鍾意，牛控你哋去晒未？

黃金六十秒快炸秘方 京都勝牛

喺日本超過50間分店嘅吉列牛專門店，所有吉列牛排沿用總店做法，裹漿採用日本技術乾麵包糠、麵粉、雞蛋製作並按照指定黃金比例調配，牛扒以攝氏190度高溫炸至金黃酥脆，上枱時保持完美三分熟，食落酥脆輕盈！牛魔王必食京都勝牛三味套餐，包含炸翼板、菲力及薄片醬味牛，可以嚐盡三款唔同嘅牛排口感～想食牛同時想食海鮮，就推介呢個名物翼板伴大海老套餐，海老大大隻又彈牙，食完真係超滿足。

黑松露吉列牛 秘

由荃灣起家，然後開到佐敦、銅鑼灣同元朗嘅吉列牛專門店，而且價錢相對實惠，難怪用餐時間會大排長龍啦～招牌板燒吉列牛選用安格斯牛肉，油脂唔係好多但分佈平均，食落都幾重牛味而且肉質鮮嫩。另外仲有呢款黑松露吉列牛，有淡淡黑松露香，多咗一份層次又唔會掩蓋牛味。

特色香草吉列牛 初見

招牌香草吉列牛係每枱必叫，牛肉外層沾滿草綠色嘅香草，啱晒相機食先！牛肉脂肪分佈平均，食落口感嫩滑，香草外層薄脆而且香草味都幾突出。牛肉份量都幾多，又附埋小火爐畀客人自己控制生熟程度，可選擇沾海鹽及蒜蓉醬，蒜蓉汁香濃惹味，送飯一流呀。

A4黑毛和牛吉列牛 頑石燒肉所

想追求吉列牛嘅香脆同埋和牛入口即溶嘅口感，西環呢間燒肉小店就啱晒你～招牌A4黑毛和牛吉列牛小排，一上枱見到啲油花就知唔簡單，大理石般嘅油花，輕輕燒幾秒已經食得。外脆內嫩而且充滿油香，會附上唔同嘅醬汁畀大家點嚟食，幾推介柚子胡椒，可以中和返和牛嘅油膩感。

韓國人氣過江龍 吉列牛忌廉烏冬專門店

來自韓國嘅人氣吉列牛專門店，首先佢連塊鐵板都特別過人，溫度夠高冇咁容易黐底之外，仲有效減少油煙，食完都唔怕成身油煙味。吉列牛選用美國肩脊肉，牛肉嫩滑同時帶少少煙韌嘅口感，同日式嘅醬汁唔同，呢度會供應秘製沙律醬、豉油同Wasabi，食落又驚喜地夾，幾有新鮮感。

文：Yanica