大隻仔溫家偉離巢TVB往外闖發展更好 IG大曬與女友放閃合照

「大隻仔」溫家偉2008年紐約回港參加《香港先生選舉》，及後返美完成學業後與TVB簽約，初期被安排於明珠台擔任天氣主播，之後就有不少綜藝節目主持和劇集演出機會，不過就未有代表作，於是決意喺2019年離巢轉至新加坡發展，拍劇之餘更開設製作公司製作飲食節目和替客戶拍攝短片，閒時學剪片、執相、拍嘢等以增值自己。於接受媒體訪問時，溫家偉就表示無後悔離開TVB，表示自己選擇出嚟發展係啱，因為有機會試唔同嘅嘢。溫家偉當時於短短一年內先後完成七套劇，首部出演嘅劇集《Last Madame》於當地收視率破盡紀錄，劇集又奪得第25屆釜山國際影展「最佳亞洲戲劇獎」並於Netflix上架；之後更於劇集《Love by Numbers》首次擔正男主角，人氣有增無減。

除咗事業順利，溫家偉愛情亦得意，不時於社交平台PO出與女朋友Rachel放閃合照；近日佢就分享與女友連同兩隻狗狗到洛杉磯行山嘅照片，女友更加主動錫錫溫家偉面珠墩，相當甜蜜。溫家偉女友Rachel係一位數碼創作者和身心靈導師，不時於IG分享教大家放鬆情緒嘅影片，亦PO出運動、旅行及泳衣照，加上一身健康膚色，感覺係名活潑熱愛戶外運動嘅女生。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！