雅虎香港新聞 給十九歲的我｜校友透露片中女生飽受壓力 促校方反思威權管治：暗啞底要學生服從就出事
【Yahoo 新聞報道】記錄英華女學校學生成長的紀錄片《給十九歲的我》爆連串爭議，今日（2月6日）暫停公映。有英華校友向《Yahoo新聞》透露，片中部份女生現外出時飽受壓力，亦有其他同學不滿校方當年稱如不願上鏡就自行迴避鏡頭，冀校方汲取教訓反思「家長式威權」管治，尊重學生話語權；曾於戲院包場看《給》的影迷形容，該片真實反映一代人的精神面貌，惜校方低估當中程序問題，對暫停公映感可惜。《Yahoo新聞》亦向在片中亮相的香港大學微生物學系講座教授袁國勇查詢，袁拒絕評論。
文字記者：盧珮瑤
《給十九歲的我》以 10 年時間追蹤 6 位英華女生成長，去年底優先場反應熱烈，上周四（2 月 2 日）公映，目前累積逾 800 萬元票房。不過其中一名女生阿聆以「萬字文」自白，稱從未同意公開放映。今（6日）片中另一女生「香港小姐」江冰滢則透露，攝製隊稱「所有人已簽署同意書」才驅使她簽署。
不滿校方著不願上鏡同學「自己避鏡頭」
英華校友陳小姐早於去年11月已觀看優先場。她指戲中真實呈現女生們的故事和生命，「嗰時覺得如果上映得，就係佢哋願意公開或者展露呢啲自己嘅過去，所以好睇在呢班女仔願意分享自己心靈，成就到套戲嘅價值」。陳小姐的母親同樣是英華校友，其母認為電影適合已為人父母者觀看，「可以學習年青人嘅諗法」。
當阿聆自白刊登後，陳小姐與片中部份女生聯絡，發現部份人現在外出時承受極大壓力，「覺得有人認得佢，對佢指指點點」。她亦認識與女生同屆的同學，有人透露當年拍攝時曾向校方提及不願上鏡，但校方著同學「咁你咪盡量避開個鏡頭囉」，「嗰件事係依賴咗學生自己點樣避免，而唔係由校方干涉（拍攝）」。
校友：英華百年歷史入面，總有啲嘢係不合時宜
陳認為校方以至社會需就事件反思「家長式威權」管治問題，「睇阿聆篇文好感受到，校方一路以來都係『大事化小，小事化無』，嗰種『傾』係抱住想說服佢嘅態度，而唔係一個聆聽」。陳續指「家長式威權」令校方自以為「我做嘅一切都係為你好」，「用呢個形式去說服學生，但暗啞底其實要個學生去服從，就係出咗事，（英華）123年歷史入面，總有啲嘢係不合時宜，要一齊進步」。
英華校訓為「非以役人，乃役於人」（Be a Man for Others)，但陳小姐強調上一輩需緊記照顧個人感受的重要性，讓年輕人獲得應有尊重，「點解阿聆嗰件事爆，因為一直忽略咗佢個人感受、叫佢『為大局著想』，佢先會出個咁大嘅『震撼彈』」，冀校方汲取教訓反思將來如何與學生真正同行。
然而陳小姐續指，連串風波亦無阻她肯定電影的意義，「學校同導演做呢件事個初心都無問題，其實都係生命教育，加埋呢啲事都可以提醒返點樣同年輕人相處」。對於有曾看電影的觀眾自責成為「幫兇」，她不敢苟同，「你要睇過先可以judge（判斷）到件事，先有資格叫人睇定唔睇」。
包場影迷：女生、觀眾、學校三輸
影迷楊先生（化名）去年12月觀看優先場，及後更發起包場讓更多觀眾觀賞。滿城風雨並未影響他對電影的肯定，「本身由學校重建無意中capture（捕捉）到香港最轉折嘅10年，無得翻轉頭再做，好似睇返呢10年香港發生過咩事，真實反映咗一代人精神面貌」。他身邊友人亦自責曾為電影給予好評，但他決不認同，「你睇得套戲會assume（假設）佢哋之間建立咗個信任，無可能吓吓去諗有無剝削人，咁sorry你唔會enjoy套戲」。
他估計導演張婉婷10年來的拍攝過程或「摸著石頭過河」，並相信校方花了多年心血拍攝，卻並未妥善處理當中與學生的程序問題，對暫停公映感到可惜，「學校輸，主角參與咗咁多拍攝搞到唔愉快都輸，觀眾都輸，唔會再睇到有機構會喺咁多紅線嘅香港做呢類嘢」。
【相關報道】
給十九歲的我｜校友透露片中女生飽受壓力 促校方反思威權管治：暗啞底要學生服從就出事
給十九歲的我｜第三名受訪學生回應公映爭議 江冰滢：拍攝隊曾言所有人已簽同意書 與阿聆真實做法有別
給十九歲的我｜張婉婷稱因受訪女生感困擾而致歉 「阿聆妳開心返啲啦，我哋依家唔做㗎喇」
《給十九歲的我》明起暫停公映 導演張婉婷：對我嚟講，人係緊要過電影
李慧詩親揭「被通知」登場《給十九歲的我》氣在心頭：這部電影我不會看
《明周文化》刊阿聆萬字文批校方不尊重意願 網站因流量極大出現故障
