老婆寸演技一般 陳展鵬造人賀捧獎 憂又係生女

兩大出爐視帝陳山聰與陳展鵬前晚出席劇集慶功宴，陳山聰笑言以獎換「獎」，希望氹到太太再造人，望今年能生女湊成「好」字。已有一女的陳展鵬笑言擔心再生都是女兒，更被太太單文柔搞笑挑機，指他演技一般：「現實生活中完全交唔到戲！」

前晚無綫劇集《超能使者》台前幕後在尖沙咀舉行慶功宴，憑該劇奪馬來西亞視帝視后的陳展鵬與劉佩玥（Moon），跟出爐無綫視帝陳山聰一齊開香檳慶祝。陳展鵬表示戥陳山聰與Moon開心，Moon說：「感恩遇到展鵬咁好嘅演員，佢係其中一個細心去幫我嘅人，好多謝佢，同埋好多人好錫我，係前世修來嘅福分。」陳展鵬笑言：「可能前世真係欠咗你！」

自認明燈

陳展鵬自爆是視帝「明燈」，凡開口貼過的心水視帝包括馬國明與袁偉豪，最終皆落敗，故今年希望陳山聰攞獎，一直不敢說出口。問到會否造人慶祝得獎？他笑言已經「成屋女人」：「希望追個仔平衡一下，但擔心再生都係女，生B隨緣啦，都想屋企多啲人。老人家講得啱，生完就好想再生。」提到太太單文柔日前在社交網上載合照放閃，表示老公得獎與否一樣會支持，更搞笑「挑機」：「內心好想說他演技很一般，還有很大進步空間，現實生活中完全交唔到戲、講極都唔明，角色仲有待揣摩，唔緊要，今世時間應該夠你慢慢鑽研啦。」

陳山聰以獎換「獎」

至於憑《金宵大廈2》首奪視帝的陳山聰表示因忙拍劇，未有時間慶祝，又稱新年願望是追多個小朋友，最想老婆生女，湊成「好」字。問到太太是否答應再生BB？他笑言：「真係想追多個，攞到呢個獎，老婆應該冇藉口，以獎換另一個『獎』，希望兔年有好消息公布。」