華堅芬力士臨陣辭演同志愛情片得罪業內監製 下場未必太慘因為錢作怪？︳電影LOL

呢兩日提到《痛愛完成式》嘅男女主角Justin Baldoni同Blake Lively疑似不和嘅新聞之外，另一單好多花生嘅消息，相信係《小丑》男主角華堅芬力士（Joaquin Phoenix)喺新片開拍前5日宣布辭演呢件事。

呢套慘被影帝臨時飛起嘅新片未有片名，由《五月的你，十二月的她》導演Todd Haynes執導，據知係一套以1930年代為背景嘅同志愛情片，另一位男主角係《衝上雲霄︰獨行俠》嘅Danny Ramirez。電影喺墨西哥取景，劇組已經準備就緒，據知前期搭景等開支都起碼七位數美金。而家華堅芬力士一嘢話唔拍，成team人相當崩潰，有報導話華堅芬力士個角色將唔會搵人頂上。

最妙嘅係，當日係華堅芬力士拎住個故事搵Todd Haynes，而Todd Haynes曾經搵華堅芬力士女友Ronney Mara拍住影后姬蒂白蘭芝(Cate Blanchett)拍《卡露的情人》，雙方交情應該有返咁上下，估唔到搞成咁。至於辭演原因，一眾媒體都未有確切說法，但近期就有人回帶話當日華堅芬力士本來都想辭演《拿破崙》，除非搵合作過嘅《大師》導演Paul Thomas Anderson出手改劇本。最後華堅芬力士留低，但劇本就無需改動。

Hollywood Reporter報導話，電影行內嘅監製們對華堅芬力士臨陣辭演一事相當不滿，甚至有傳打算以法律行動追討。過去荷里活都有同類事件，女星金碧辛嘉喺1993年因違反口頭承諾拒拍電影《情碎海倫娜》而被告上法庭，金碧辛嘉本來敗訴，但後來上訴成功，最終都要賠380萬。大隻佬布斯韋利士都試過拍拍下迪士尼作品辭演，最終要以「友情價」為迪記拍返3套戲補飛，其中兩套係《絕世天劫》同《鬼眼》。

不過行內人都於同華堅芬力士打官司不表樂觀，因為佢套新戲《小丑︰雙瘋》10月上映，上集《小丑》全球大收10億美元，相信呢集成績都唔慌差得去邊，估計華堅芬力士將會有豐厚票房分紅，因此行內人相信佢就會拎返一百幾十萬出嚟，俾辭演新片嘅劇組當賠償。

更多電影文章

蠟筆小新劇場版：我們的恐龍日記／分期付款愛上你／邊緣禁地：沙丘喪戰／圈套／默殺／飢餓教室︳電影LOL 今期睇咩戲

《痛愛完成式》導演兼男主角Justin Baldoni 被傳犯眾憎 首映禮同女主角Blake Lively零交流︳電影LOL

《痛愛完成式》開畫收8千萬美金「死侍」伉儷包辦北美票房冠亞軍創紀錄 ︳電影LOL

男星Gabriel Olds涉強姦三女被捕／琦溫斯莉拍戲凸腩霸氣回應／Jenna Ortega︰政治正確令人好假︳電影LOL 周五外娛速食

美國有貓貓片電影節入戲院專睇喵星人 負責人一年睇萬五條片揀蟀︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！