葡萄友：按章工作反被指罵 應立法設「辱巴士司機罪」

本星期初港島區嘅巴士司機發起工業運動，實行按章工作，只會於站口先會畀乘客上落車，全因為早排有巴士司機因為喺Sogo一個長期被的士堵塞嘅路邊到落客，畀警察抄牌。至於當日發起行動，作為市民，無人關心Sogo長期被的士司機佔用問題，只係關心自己上車落車，驚巴士司機阻住自己返工！當日就出現唔少市民鬧巴士司機嘅情況，指責巴士司機佢哋「無端生事」，種種辱罵；其中一個例子就係有旅遊巴泊喺巴士站，於是巴士司機就唔泊站，要求旅遊巴司機開車讓位，結果乘客對巴士司機謾罵不止，並報警求助，最後乘客的槍口一致對向守法嘅巴士司機，而非違例泊車嘅旅遊巴。巴士司機近年都受到莫大壓力，郁啲就舉機拍片，被眾多無理乘客挑釁，甚至惡意舉報，實為非常大壓力，在此不如考慮要求政府立法「辱巴士司機罪」！

為公義壓力大
巴士司機按章工作，對準車站先上落客實屬正常不過，看不過眼違例泊車嘅的士、旅遊巴，實為依法行為，絕對係為公義，但反被乘客指罵，完全唔體諒，當中所受壓力非常大，請求巴士公司上級唔好再要求巴士司機「專業」及「容忍」，面對挑釁，唔應該罵不還口，上級應予以鼓勵：「你哋無做錯！」

籌安家費
巴士司機每日喺法例嘅邊緣之間行走，輕則食牛肉乾，重則撞到胡亂過馬路嘅途人，被控告危險駕駛，種種都係要自己負責。建議巴士公司應考慮豁免巴士司機執勤時之刑責，或者就算真係不幸負上刑罰，所謂「聖人都有錯」。亦應該全體員工夾錢幫助，不幸入獄亦要籌組安家費。

打乘客無問題
記得去年有人因為巴士司機覆電話而遲開車2分鐘，然後拍片再向巴士公司投訴，令巴士司機被辭退，慘失長俸。從片中見到該男乘客不停用惡言惡語挑釁司機，在此建議巴士公司放寛司機遇上此等無理挑釁時，可以拉埋暗角拳打腳踢，實屬可以理解及正義之行為，所謂「司機做嘢唔使你教」。