葡萄友：《西遊伏妖篇》根本唔係畀香港人睇

農曆新年都過得七七八八，唔知大家今年又睇咗邊幾套賀歲片呢？星爺周星馳近年非常多產，每年新年賀歲片都必定有份，今年嘅《西遊2伏妖篇》聽聞大陸已收十幾億，可能可以打破《美人魚》34億票房紀錄喎。不過始終文化唔同，香港人普通嚟講對今次嘅西遊都係失望嘅，明明已經特登加埋廣東話配音，明顯係特別為咗香港觀眾，但點解大家仲咁唔受落呢？一齊睇睇。

笑位炒冷飯
星爺嘅粉絲幾乎背得出佢每套電影嘅對白同橋段，但今次《西遊2》 就不停翻炒舊Gag，例如生鬚宮女、豬扒後宮佳麗三千等等，通通都係以前星爺嘅橋段，問題係，演嘅唔係星爺，已經唔會有意思啦。

演員唔掂
上集西遊都話尚有黃渤、文章、羅志祥等搞笑之人，今集換上吳亦凡、林更新等大陸演員孭飛，奈何兩位嘅喜劇都極差，種種表情都無法達到令人一望就笑嘅級數，加上香港觀眾就對佢哋更陌生啦。

劇情無突破
上一集《西遊降魔篇》都叫做人設打破傳統，令人有意想不到嘅驚喜，例如豬八戒係靚仔、孫悟空係又矮又醜等等；但去到今集，又再用上次嘅相同人設，例如孫悟空好暴戾等，已經估到晒，不再驚喜。

受夠了無星爺的戲
坦白講，近年所有星爺作監製嘅戲之所以大收，都係因為大家想重拾當年睇佢戲嘅無厘頭白痴情節，哪怕唔係星爺主演，都希望從中得到6、7成嘅滿足；但一次又一次得嚟嘅係令人笑唔出嘅老土劇情同配音，恐怕已經令大家非常抗拒喇。