電影LOL︳《狂野時速》第10集開機一周後 導演林詣彬突然劈炮

全球超賣座系列《狂野時速》一集比一集收得，《狂9》無懼疫情困擾，去年上映時全球大收7.2億美元！雖然第9集已經飛車飛到上太空，不過電影公司仍然信心十足，一口氣鐵定開第10、11集，更宣佈搵嚟「水行俠」Jason Momoa及「Marvel隊長」Brie Larson加入為第10集坐陣。

電影上星期正式開工拍攝，同日宣佈第10集正式片名為Fast X，男主角Vin Diesel仲同導演林詣彬(Justin Lin）拍哂片擺上ig，片中林導仲話Fast 10將會係系列最好嘅一集，點知今日就出聲明辭去導演一職！

林導透過環球影業發出官方聲明表示，「辭去導演職務係艱難嘅決定，我仍會為電影擔任製作人。過去10年拍出《狂》系列5部電影，同最好嘅演員合作，拍出最好嘅特技及追車場面。作為移民後裔，我非常自豪參與及建立電影史上最多元嘅系列電影。」

《狂野時速》嘅成功林詣彬居功至偉，系列過半都係出自佢手，將「街頭飛車」塑造成今時今日全球大賣系列電影，Fast X林導直頭有份寫劇本，突然於電影開拍1個星期後宣佈劈炮令人意外！據外媒Deadline報導，林詣彬辭職主要同環球影業存在創作上分岐，傾唔掂最後放低導演筒。

Fast X暫時停工，據聞環球已經同幾位繼任人選接洽，好快會確定邊個接手。F9咁收得，林詣彬又得fans心，接手嗰位導演怕且要有返咁上下抗壓性。一向好快手喺自己社交媒體交代電影動向嘅《狂》製作人兼男主角Vin Diesel一反常態無出post。其實作為《狂》嘅招牌又同林導合作無間，環球會唔會考慮比Vin Diesel接手執導？

Fast X映期暫未受導演辭職影響，仍定於下年5月19日上映。

更多電影文章

電影LOL．今期睇咩戲︳怪獸與鄧不利多的秘密／月球隕落／喪盡癲才／星夢動物園2

電影LOL︳玩具車仔Hot Wheels拍大電影 會唔會搞出玩具元宇宙？

電影LOL︳巧合？Will Smith掌摑事件後 再有新作計劃叫停 都係話唔關打人事？

電影LOL︳炒冷飯熱潮 片廠重拍《死亡習作》延續偽紀錄片風格有冇bug？

電影LOL︳《雷神4》預告片登場 Natalie Portman變女雷神勁大隻 仲有銀河守護隊出場！

電影LOL︳戲院下周重開 《蝙蝠俠》終於有得睇 《梅艷芳》再上映

電影LOL︳《婚前昏後》荷里活青春版？肥Amy Rebel Wilson新片Senior Year演昏迷廿年超齡高中生

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載